(អន្តរជាតិ)៖ ប្រធានាធិបតី ដូណាល់ ត្រាំ និងគូប្រជែងប្រធានាធិបតី លោក ចូ បៃដិន បានសម្រុកបង្កើនការឃោសនាយុទ្ធនាការបោះឆ្នោតយ៉ាងខ្លាំងមិនសំចៃ ខណៈសល់តែ១៦ថ្ងៃមុនពេលបោះឆ្នោតមកដល់។ នេះបើយោងតាមការចុះផ្សាយរបស់ CAN នៅថ្ងៃទី១៩ ខែតុលា ឆ្នាំ២០២០។

លោក ត្រាំ បានធ្វើដំណើរទៅកាន់រដ្ឋជាច្រើនដូចជារដ្ឋ Nevada រដ្ឋ California ហើយបន្ទាប់មកត្រឡប់ទៅរដ្ឋ Nevadaវិញ ដើម្បីធ្វើការប្រមូលផ្តុំគ្នា និងរៃអង្គាសប្រាក់មួយថ្ងៃមុនពេលធ្វើដំណើរទៅកាន់រដ្ឋ អារីហ្សូណា (Arizona) នៅថ្ងៃច័ន្ទសប្ដាហ៍នះ។

ចំណែក លោក ចូ បៃដិន ជាមួយការដាក់កម្រិតលើយុទ្ធនាការផ្ទាល់ខ្លួនរបស់លោក ដោយសារតែមានការព្រួយបារម្ភ អំពីជំងឺឆ្លងរាតត្បាតសកល (COVID-19) លោកបានធ្វើដំណើរត្រលប់មកកាន់រដ្ឋ North Carolina វិញសម្រាប់ព្រឹត្តិការណ៍នានា។ ដោយកាលពីម្សិលមិញនេះនៅទីក្រុង Durham អតីតអនុប្រធានាធិបតីរូបនេះបានពាក់ម៉ាស និងបានឡើងថ្លែងសុន្ទរកថានៅលើឆាក ស្ថិតក្នុងទីធ្លាចំណតរថយន្តមួយកន្លែង ដែលមានអ្នកគាំទ្ររាប់សិបនាក់កំពុងរង់ចាំលោក។

ខណៈការបោះឆ្នោតកាន់តែកៀកចូលមកដល់ បេក្ខភាពប្រធានាធិបតីទាំង២រូបនេះ កំពុងធ្វើការដើម្បីរៀបចំមូលដ្ឋាននយោបាយរបស់ខ្លួន និងអំពាវនាវដល់ពលរដ្ឋមួយចំនួនតូច ដែលមិនទាន់បានសំរេចចិត្តក្នុងការបោះឆ្នោត ឲ្យងាកត្រលប់មកចូលរួមក្នុងការបោះឆ្នោតខាងមុខនេះវិញ ហើយការតស៊ូមតិប្រធានាធិបតីចុងក្រោយ នឹងធ្វើឡើងនៅ ល្ងាចថ្ងៃព្រហស្បតិ៍សប្ដាហ៍នេះនៅទីក្រុង Nashville នៃរដ្ឋ Tennessee៕