(ភ្នំពេញ)៖ ក្នុងពិធីរម្លឹកខួបអនុស្សាវរីយ លើកទី៦៧ ទិវាកំណើតកងយោធពលខេមរភូមិន្ទ និងស្របជាមួយទិវាបុណ្យឯករាជ្យជាតិ ថ្ងៃទី០៩ ខែវិច្ឆិកា ឆ្នាំ១៩៥៣-ថ្ងៃទី០៩ ខែវិច្ឆិកា ឆ្នាំ២០២០ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីការពារជាតិ បានផ្ញើសារជូនពរ ជូននាយទាហាន នាយទាហានរង និងពលទាហាន នៃកងយោធពលខេមរភូមិន្ទ។
ក្នុងឱកាសនេះ សម្តេចពិជ័យសេនា ទៀ បាញ់ បានសម្តែងនូវការកោតសរសើរយ៉ាងស្មោះ ចំពោះជោគជ័យដ៏ត្រចះត្រចង់នូវសមិទ្ធផលដ៏ធំធេងក្នុងឆ្នាំកន្លងមក ក្នុងកិច្ចការពារជាតិមាតុភូមិ ការពារសន្តិសុខជាតិ ថែរក្សាសន្តិភាព ស្ថិរភាពនយោបាយ និងភាពសុខក្សេមក្សាន្តរបស់ប្រជាជន។ ពិសេសកងយោធពលខេមរភូមិន្ទយើង បានចូលរួមអនុវត្តប្រកបដោយជោគជ័យនូវភារកិច្ចអន្តរជាតិ លើវិស័យមនុស្សធម៌ បំពេញបេសកកម្មជាកងកម្លាំងរក្សាសន្តិភាព ក្រោមឆត្ររបស់អង្គការសហប្រជាជាតិ ដើម្បីបុប្វហេតុសន្តិភាព និងកិច្ចសហប្រតិបត្តិការអន្តរជាតិល្អ ដែលជាក្តីមោទកភាព និងជាកិត្តិយសដ៏ខ្ពង់ខ្ពស់របស់កងយោធពលខេមរភូមិន្ទ ក៏ដូចជាប្រជាជាតិកម្ពុជាយើងទាំងមូល មិនធ្លាប់មាន នៅក្នុងប្រវត្តិសាស្ត្រពីមុនមក ធ្វើឲ្យកិត្យានុភាពរបស់ព្រះរាជាណាចក្រកម្ពុជា កាន់តែល្បីរន្ទឺ នៅលើឆាកអន្តរជាតិ។
ជាសរុបមកវិញ សម្តេចពិជ័យសេនា ទៀ បាញ់ បានកត់សម្គាល់ថា រាល់សមិទ្ធផលដ៏ធំធេង ដែលសម្រេចបានកន្លងមកនេះ គឺអាស្រ័យដោយការខិតខំប្រឹងប្រែង តស៊ូលះបង់ ពុំខ្លាចនឿយហត់ និងការធ្វើពលិកម្មគ្រប់បែបយ៉ាង គួបផ្សំជាមួយនឹងស្មារតីទទួលខុសត្រូវខ្ពស់របស់ថ្នាក់ដឹកនាំគ្រប់ស្ថាប័ន កងឯកភាព ក្នុងការចាត់តាំងអនុវត្តការងារជាក់ស្តែង៕
