(សហរដ្ឋអាមេរិក)៖ ក្រុមបាតុករ បាននាំគ្នាធ្វើការតវ៉ានៅតាមដងផ្លូវនានានៅទូទាំងសហរដ្ឋអាមេរិកដើម្បីទាមទារឱ្យរាប់សន្លឹកឆ្នោតទាំងអស់ នៅក្នុងការបោះឆ្នោតប្រធានាធិបតីអាណត្តិថ្មី។ នេះបើយោងតាមការចុះផ្សាយរបស់ NHK នៅថ្ងៃទី០៥ ខែវិច្ឆិកា ឆ្នាំ២០២០។

ក្រុមយុទ្ធនាការរបស់ប្រធានាធិបតី លោក​ ដូណាល់ ត្រាំ កំពុងបន្តសកម្មភាពប្តឹងទៅតុលាការ ដើម្បីបញ្ឈប់ការរាប់សន្លឹកឆ្នោតនៅក្នុងរដ្ឋមួយចំនួន ដោយអះអាងថាមានភាពមិនប្រក្រតី។ លោក ត្រាំ តែងតែចោទប្រកាន់ថាការបោះឆ្នោត ឆ្នាំ២០២០នេះ គឺពោរពេញដោយអំពើពុករលួយ និងការក្លែងបន្លំសន្លឹកឆ្នោត។

នៅថ្ងៃពុធនេះ (ម៉ោងនៅសហរដ្ឋអាមេរិក) មនុស្សរាប់រយនាក់បានប្រមូលផ្តុំគ្នានៅទីក្រុងញូវយ៉ក ដើរដង្ហែតាមដងផ្លូវដោយកាន់បដាដែលសរសេរថា «រាប់សន្លឹកឆ្នោត» និង «រាប់រាល់សន្លឹកឆ្នោតទាំងអស់»។ ក្រុមអ្នកតវ៉ាគ្រប់វ័យ បានចូលរួមក្នុងការតវ៉ាដោយស្រែកថា «ការពារលទ្ធិប្រជាធិបតេយ្យ» និង «រង់ចាំរហូតដល់សន្លឹកឆ្នោតទាំងអស់ត្រូវបានរាប់»។

សន្តិសុខត្រូវបានរឹតបន្តឹងនៅក្នុងទីក្រុងញូវយ៉កដោយសារតែការព្រួយបារម្ភអំពីភាពចលាចលដែលអាចកើតមានបន្ទាប់ពីការបោះឆ្នោត។ មិនត្រឹមតែប៉ុណ្ណោះក៏មានការពង្រាយនូវកងកម្លាំងដើម្បីការពារនៃការប៉ះទង្គិចគ្នារវាងអ្នកគាំទ្រលោក ដូណាល់ ត្រាំ និងក្រុមបាតុករ៕