(ភ្នំពេញ)៖ ថ្ងៃទី២៩ ខែតុលា ឆ្នាំ២០២០ នេះ ជាខួប លើកទី១៦ឆ្នាំ នៃព្រះរាជពិធីយាងគ្រងព្រះបរមសិរីរាជសម្បត្តិរបស់ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី។ នៅថ្ងៃនេះ សហភាពសហព័ន្ធយុវជនកម្ពុជា ដែលបានឯកឧត្តម ហ៊ុន ម៉ានី ជាប្រធាន បានចូលរួមថ្វាយព្រះពរព្រះមហាក្សត្រ ក្នុងឱកាសនៃព្រះរាជពិធីបុណ្យខួប លើកទី១៦ នៃការយាងគ្រងព្រះបរមសិរីរាជសម្បត្តិ ថ្ងៃទី២៩ ខែតុលា ឆ្នាំ២០០៤- ថ្ងៃទី២៩ ខែតុលា ឆ្នាំ២០២០។
សហភាពសហព័ន្ធយុវជនកម្ពុជា លើកឡើងថា «ទូលព្រះបង្គំយើងខ្ញុំ ជាកូនចៅ សមាជិក សមាជិកា សហភាពសហព័ន្ធយុវជនកម្ពុជា សូមក្រាបថ្វាយព្រះសព្វសាធុការពរជ័យថ្វាយអង្គព្រះករុណា សម្តេច ព្រះបរមនាថ ព្រះនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ក្នុងវរោកាសនៃខួបទី១៦ នៃព្រះរាជពិធីឡើងគ្រងបរមរាជសម្បត្តិព្រះករុណាជាអម្ចាស់ជីវិតលើត្បូង»។
