(ភ្នំពេញ)៖ កាលពីថ្ងៃទី១ ខែតុលា ឆ្នាំ២០២០ សហភាពសហព័ន្ធអ្នកសារព័ត៌មានកម្ពុជា ស.ស.ស.ក បានប្រគល់ថវិកា ដែលបានមកពីការចូលរួមវិភាគពីថ្នាក់ដឹកនាំ និងសមាជិក-សមាជិកា ស.ស.ស.ក ជូនលោក ស៊ិន សារ៉េត អ្នកកាសែតចូលនិវត្ត ផ្នែកថតរូបរបស់ទីភ្នាក់ងារសារព័ត៌មានកម្ពុជា AKP ដែលមានជំងឺក្រពះ និងទឹកនោមផ្អែម។ បន្ទាប់ពីទទួលបានសារស្នើសុំជំនួយពីលោក ស៊ិន សារ៉េន គឺកាលពីថ្ងៃទី២៨ ខែកញ្ញា ឆ្នាំ២០២០ ឯកឧត្តម ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា ស.ស.ស.ក បានបញ្ជូនសារតាមក្រុមតេឡេក្រាម ដើម្បីឲ្យសមាជិក-សមាជិកា ស.ស.ស.ក ចូលរួមបរិច្ចាគថវិកាជួយដល់លោក ស៊ិន សារ៉េត។
លោក ស៊ិន សារ៉េត លើកឡើងថា លោកបានទទួលកញ្ចប់ថវិកាឧបត្ថម្ភពីសហភាពសហព័ន្ធអ្នកសារព័ត៌មានកម្ពុជា ហើយ ដោយមានលុយខ្មែរ ចំនួន ៤១ម៉ឺនរៀល និងលុយដុល្លារ ចំនួន ៦៩៥ដុល្លារ។
លោក ស៊ិន សារ៉េត បានបន្ថែមថា «ខ្ញុំបាទសូមអរគុណចំពោះឯកឧត្ដម ហ៊ុយ វណ្ណៈ ខ្លាំងណាស់ ដែលមានទឹកចិត្តអាណិតស្រឡាញ់ជួយខ្ញុំ ដែលកំពុងជួបទុក្ខលំបាក។ អំណោយនេះ ពិតជាមានតម្លៃខ្លាំងណាស់ សម្រាប់ជីវិតខ្ញុំ»។
ចំណែកឯឧត្តម ហ៊ុយ វណ្ណៈ ប្រធានស.ស.ស.ក លើកឡើងថា
«ទឹកចិត្តសប្បុរសធម៌របស់គ្រួសារ ស.ស.ស.ក មានតម្លៃធំធេងណាស់ សម្រាប់គាត់ ហើយមុនដំបូងបំផុត គឺធ្វើឲ្យគាត់មានក្តីសង្ឃឹមក្នុងចិត្ត និងមានកម្លាំងចិត្តជម្នះការលំបាក។ ផលបុណ្យនេះ ត្រឡប់ទៅទ្រទ្រង់លោកអ្នកជាបន្តបន្ទាប់»។
មានអាយុ ៦៦ឆ្នាំ នៅឆ្នាំ២០២០ នេះ លោក ស៊ិន សារ៉េត អតីតមន្ត្រីរាជការ ជាអ្នកយកព័ត៌មានរូបថតទីភ្នាក់ងារសារព័ត៌មាន SPK បច្ចុប្បន្នដូរ មកជាទីភ្នាក់ងារសារព័ត៌មានកម្ពុជា AKP ក្រសួងព័ត៌មាន។
លោកបានបំរើការងារ ក្នុងវិស័យព័ត៌មាន ជាមន្ត្រីរាជការនេះ អស់រយៈពេលជិត ៤០ឆ្នាំកន្លងមកហើយ សព្វថ្ងៃនេះ លោកបានចូលនិវត្តន៍ហើយ។ តែអកុសល លោកមានជំងឺទឹកនោមផ្អែម ប្រចាំកាយ ជំងឺក្រពះ និងជំងឺដុះសាច់ ក្នុងពោះវៀនធំ ដំណាក់កាលទី១ ចូលទី២ ( សាច់កាច ) និងត្រូវបានវះកាត់រួចហើយ ដែលការវះកាត់ មានចំនួនបីដង។ ការវះកាត់ លើកទី១ នៅភ្នំពេញ លើកទី២ នៅភ្នំពេញ និងលើកទី៣ នៅសុរិន ប្រទេសថៃ។ សព្វថ្ងៃ លោក ស៊ិន សារ៉េត សម្រាកនៅព្យាបាលក្រពះ និងព្យាបាលជំងឺទឹកនោមផ្អែម នៅផ្ទះ តាមវេជ្ជបញ្ជារបស់លោកគ្រូពេទ្យឯកទេសជំងឺទឹកនោមផ្អែម ដោយត្រូវបន្តប្រើប្រាស់ថ្នាំ ដើម្បីព្យាបាលជំងឺនេះ អស់មួយជីវិត មិនអាចខានប្រើបានទេ។ លោក ស៊ិន សារ៉េត បានជម្រាបជូនឯកឧត្តម ហ៊ុយ វណ្ណៈ ថា «ដើម្បីទ្រទ្រង់ថែរក្សាសុខភាពរបស់ខ្ញុំបាទ អោយបានល្អប្រសើរ និងព្យាបាលជំងឺបន្ត ខ្ញុំបាទសុំកាឧបត្ថម្ភនូវថវិកាបន្តិចបន្តួច ដើម្បីទិញថ្នាំព្យាបាលជំងឺ ដោយក្តីអាណិតស្រឡាញ់ដល់ខ្ញុំបាទផងចុះ»។
លោក ស៊ិន សារ៉េត ជាអតីតជាមន្ត្រីអ្នកយកព័ត៌មានរូបថតរបស់ទីភ្នាក់ងារសារព័ត៌មានកម្ពុជា AKP នៃក្រសួងព័ត៌មាន សព្វថ្ងៃ លោករស់នៅ សង្កាត់បឹងទំពុន ខណ្ឌមានជ័យ រាជធានីភ្នំពេញ ៕
