(ភ្នំពេញ)៖ កិច្ចព្រមព្រៀងពាណិជ្ជកម្មសេរី កម្ពុជា-ចិន នឹងត្រូវចុះហត្ថលេខា រវាងថ្នាក់ដឹកនាំកម្ពុជា និងចិន នៅថ្ងៃចន្ទ ទី១២ ខែតុលា ឆ្នាំ២០២០ អំឡុងពេលរដ្ឋមន្ត្រីការបរទេសចិន ឯកឧត្តម វ៉ាង យី បំពេញទស្សនកិច្ចផ្លូវការរយៈពេល ២ថ្ងៃ នៅកម្ពុជា ចាប់ពីថ្ងៃទី១១-១២ ខែតុលា ឆ្នាំ២០២០ នេះ។
កិច្ចព្រមព្រៀងពាណិជ្ជកម្មសេរី កម្ពុជា-ចិន ត្រូវបានពន្យារពេលចុះហត្ថលេខា កាលពីខែសីហា ឆ្នាំ២០២០ ដោយសារជំងឺកូវីដ១៩។
ដើមឡើយ កិច្ចព្រមព្រៀងនេះ ត្រូវបានថ្នាក់ដឹកនាំកម្ពុជា និងចិន កំណត់យកថ្ងៃទី១២ ខែសីហា ឆ្នាំ២០២០ ដើម្បីចុះហត្ថលេខា ដោយកាលណោះ សម្តេចតេជោ នាយករដ្ឋមន្ត្រី គ្រោងនឹងដឹកនាំគណៈប្រតិភូកម្ពុជា អញ្ជើញទៅទស្សនកិច្ច នៅទីក្រុងប៉េកាំង ប្រទេសចិន។ ប៉ុន្តែគម្រោងកាលណោះ ត្រូវលើកពេល ដោយសារតែជំងឺកូវីដ១៩។
ថ្ងៃទី១២ ខែសីហា ឆ្នាំ២០២០ ជាថ្ងៃ ដែលសហភាពអឺរ៉ុប សម្រេចដកប្រព័ន្ធអនុគ្រោះពន្ធ EBA ចំនួន ២០% ពីកម្ពុជា។
យ៉ាងណាក៏ដោយ រដ្ឋមន្ត្រីក្រសួងពាណិជ្ជកម្ម ឯកឧត្តម ប៉ាន សូរស័ក្តិ បានលើកឡើងថា តាមរយៈកិច្ចព្រមព្រៀងពាណិជ្ជកម្មសេរីកម្ពុជា-ចិន នឹងជួយជំរុញឧស្សាហកម្មកម្ពុជា ឲ្យបានខ្ពស់ថែមទៀត ដូចជា ការផលិតគ្រឿងអេឡិចត្រូនិកទូរស័ព្ទ ជាដើម។ ជាពិសេស កម្ពុជា នឹងអាចនាំផលិតផលកសិកម្ម ទៅប្រទេសចិនបាន ដូចជា ផ្លែចេក ជាដើម។
តាមរយៈកិច្ចព្រមបព្រៀងពាណិជ្ជកម្មសេរី រវាងកម្ពុជា និងចិន ដែលចុះហត្ថលេខា នាថ្ងៃទី១២ ខែតុលា ឆ្នាំ២០២០ រាជរដ្ឋាភិបាលកម្ពុជា រំពឹងថា ការនាំចេញពីកម្ពុជា ទៅចិន នឹងកើនឡើងប្រមាណ ២៥%។
ក្រសួងពាណិជ្ជកម្មកម្ពុជា បានប្រកាសរួចហើយថា ទំនិញកម្ពុជាជាង ៣០០មុខ អាចនាំទៅចិន ដោយមិនគិតពន្ធ នៅពេលកិច្ចព្រមព្រៀងពាណិជ្ជកម្មសេរីទ្វេភាគី កម្ពុជា-ចិន(FTA) ចូលជាធរមាន នៅដើមឆ្នាំ២០២១។ ក្នុងចំណោមមុខទំនិញជាង ៣០០មុខនេះ គឺផលិតផលកសិកម្ម ៩៥ភាគរយ ត្រូវរួចពន្ធ សម្រាប់ការនាំចេញ ទៅចិន។ ប៉ុន្តែផលិតផលគ្រឿងចក្រ និងយានយន្តផ្សេងៗ វិញ ចិននៅតែបន្តយកពន្ធនាំចូលដដែល។
មន្ត្រីជាន់ខ្ពស់ក្រសួងពាណិជ្ជកម្ម លើកឡើងថា ប្រទេសកម្ពុជា បានចុះបញ្ជីទំនិញប្រមាណជា ៣៤០ មុខទំនិញទៀត ដើម្បីនាំចេញទៅកាន់ប្រទេសចិនក្រោមកិច្ចព្រមព្រៀងពាណិជ្ជកម្មសេរី(FTA ) កម្ពុជា-ចិន ដែលនាំឱ្យប្រភេទមុខទំនិញសរុប ដែលកម្ពុជា អាចនាំចេញទៅកាន់ប្រទេសចិន មានចំនួនច្រើនជាង ១០ ០០០ ប្រភេទ ខណៈដែលផលិតផលភាគច្រើន គឺបានមកពីវិស័យកសិកម្ម ការកែច្នៃកសិផល និងផលិតផលផ្សេងទៀត ដែលប្រទេសកម្ពុជា បានទទួលពីកិច្ចព្រមព្រៀងពាណិជ្ជកម្មសេរីអាស៊ាន-ចិន។
ក្នុងសន្និសីទកាសែត កាលពីថ្ងៃទី២៨ ខែកក្កដា ឆ្នាំ២០២០ ឯកឧត្តម សុខ សុភ័ក្ត្រ រដ្ឋលេខាធិការក្រសួងពាណិជ្ជកម្ម និងជាប្រធានក្រុមចរចាពាណិជ្ជកម្មសេរី កម្ពុជា-ចិន លើកឡើងថា តាមរយៈលទ្ធផលបញ្ចប់នៃកិច្ចចរចាបង្កើតកិច្ចព្រមព្រៀងពាណិជ្ជកម្មសេរីទេ្វរភាគី កម្ពុជា ចិន FTA មានផលិតផលជាង ១០ ០០០ មុខ ពីកម្ពុជា ត្រូវបានចុះបញ្ជីសម្រាប់នាំចេញទៅកាន់ប្រទេសចិន ខណៈដែលចិន ក៏នឹងអនុញ្ញាតឱ្យចុះបញ្ជីផលិតផលជាង ៩ ៥០០ សម្រាប់នាំចេញមកកាន់ប្រទេសកម្ពុជាវិញផងដែរ។
ក្រសួងពាណិជ្ជកម្ម បានប្រកាសថា កាលពីឆ្នាំ២០១៩ ទំហំពាណិជ្ជកម្មរវាងកម្ពុជា-ចិន សម្រេចបានជាង ៨០០០ លានដុល្លារ កើនឡើង ២៧% ធៀបនឹងឆ្នាំ២០១៨។ កម្ពុជានាំចេញទំនិញទៅប្រទេសចិន កើនឡើងដល់ ១០០០ លានដុល្លារ ខណៈនាំចូលពីចិន ក្នុងទឹកប្រាក់ជិត ៧០០០ លានដុល្លារ។ ភាគច្រើននៃទំនិញនាំចូលពីចិន ជាគ្រឿងចក្រ បំរើឲ្យតម្រូវការផ្នែកសំណង់ រីឯទំនិញកម្ពុជា នាំចូលទៅចិនភាគច្រើនជាផលិតផលកសិកម្ម។
កម្ពុជា និងចិន គ្រោងបង្កើនទំហំពាណិជ្ជកម្មទ្វេភាគីឲ្យដល់ ១០ ០០០ លានដុល្លារ ត្រឹមឆ្នាំ២០២៣៕
