(ភ្នំពេញ)៖ គ.ជ.ប បានប្រកាសនៅព្រឹកថ្ងៃអាទិត្យ ទី១១ ខែតុលានេះថា ក្នុងរយៈពេល ១០ថ្ងៃ គិតចាប់ពីថ្ងៃទី១ ដល់ថ្ងៃទី១០ ខែតុលា ឆ្នាំ២០២០ គ.ជ.ប បានចុះឈ្មោះអ្នកបោះឆ្នោតថ្មី សរុបចំនួន ១៤១ ៥១៣ នាក់ ត្រូវជាជាង ៤៧% នៃចំនួនអ្នកដែលត្រូវចុះឈ្មោះបោះឆ្នោតថ្មី ដែលគ.ជ.ប ប៉ាន់ស្មាន មានចំនួន ៣០០ ៣៩០ នាក់។
ក្រៅពីចុះឈ្មោះអ្នកបោះឆ្នោតថ្មី ក្នុងរយៈពេល ១០ថ្ងៃនេះ គ.ជ.ប ក៏បានធ្វើបច្ចុប្បន្នភាពបញ្ជីបោះឆ្នោត ដោយលុបឈ្មោះអ្នកបោះឆ្នោត ចេញពីបញ្ជីបោះឆ្នោតសរុបចំនួន ៥៣ ៨៣១នាក់ កែតម្រូវអត្តសញ្ញាណអ្នកបោះឆ្នោតសរុប ៤៤ ៧៨៧ នាក់ និងផ្ទេរចូលសរុប ៤១ ១៥៣នាក់។
គ.ជ.ប បានប្រកាសថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២០ ប្រព្រឹត្តទៅចាប់ពីថ្ងៃទី១ ដល់ថ្ងៃទី១៩ ខែតុលា ឆ្នាំ២០២០ គិតទាំងថ្ងៃសៅរ៍ និងថ្ងៃអាទិត្យ។ ក្នុងរយៈពេល ១៩ថ្ងៃនេះ ប្រជាពលរដ្ឋ អាចទៅពិនិត្យមើលឈ្មោះក្នុងបញ្ជីបោះឆ្នោតចុងក្រោយ ដើម្បីស្នើសុំកែទិន្នន័យ ប្រសិនបើមានចំណុចខុសឆ្គង និងទៅចុះឈ្មោះបោះឆ្នោតឲ្យបានគ្រប់ៗគ្នា ចំពោះប្រជាពលរដ្ឋ ដែលទើបគ្រប់អាយុ ១៨ឆ្នាំ ( កើតមុន ឬកើតត្រឹមថ្ងៃទី១ ខែមករា ឆ្នាំ២០០៣ ) និងប្រជាពលរដ្ឋ ដែលមិនធ្លាប់ចុះឈ្មោះបោះឆ្នោតពីមុន។
គ.ជ.ប ក៏បានប្រកាសឲ្យប្រជាពលរដ្ឋ ចូលទៅកាន់គេហទំព័រ www.nec.gov.kh/khmer/taxonomy/term/327 ដើម្បីពិនិត្យមើលតារាងលទ្ធផលបណ្តោះអាសន្ននៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២០ ប្រចាំថ្ងៃ៕
