(ភ្នំពេញ)៖ ឯកឧត្ដម ជិន ម៉ាលីន រដ្ឋលេខាធិការក្រសួងយុត្តិធម៌ និងជាអនុប្រធានគណៈកម្មាធិការសិទិ្ធមនុស្សកម្ពុជា នៅយប់ថ្ងៃទី២ ខែធ្នូ ឆ្នាំ២០២០នេះ បានបង្ហោះសារដោយផ្ដាំផ្ញើឲ្យអ្នកសារព័ត៌មាន ជួយសួរ៤សំណួរទៅកាន់​អង្គ​ការសិទ្ធិមនុស្សជាតិ-អន្តរជាតិ ដែលនៅតែទាមទារឲ្យឈប់សម្រាក និងជួបជុំប្រារព្ធទិវាសិទ្ធិមនុស្ស១០ឆ្នូ។

ខាងក្រោមនេះជាសំណេររបស់ឯកឧត្ដម ជិន ម៉ាលីន ទាំងស្រុង ដែលបានបង្ហោះនៅលើទំព័រហ្វេសប៊ុករបស់ខ្លួននៅមុននេះបន្តិច!

សូមបងប្អូនអ្នកសារព័ត៌មានជួយផ្តាំសួរឱ្យផង!

៤សំណួរ សម្រាប់សង្គមស៊ីវិលសិទ្ធិមនុស្សជាតិនិងអន្តរជាតិដែលនៅតែទាមទាឱ្យឈប់សម្រាកនិងជួបជុំប្រារព្ធទិវាសិទ្ធិមនុស្ស១០ឆ្នូ៖

១. តើសិទ្ធិមនុស្សនិងប្រជាធិបតេយ្យនៅកម្ពុជានឹងធ្លាក់ចុះ ដើរថយក្រោយ ឬយ៉ាងណា ប្រសិនបើមិនបានឈប់សម្រាកនិងជួបជុំគ្នាប្រារព្ធទិវាសិទ្ធិមនុស្ស១០ឆ្នូ មួយថ្ងៃនេះ?

២. តើមានប្រទេសប្រជាធិបតេយ្យប៉ុន្មានលើពិភពលោកនិងជាពិសេសក្នុងតំបន់អាស៊ានយើងនេះ ដែលគេឈប់សម្រាកនិងជួបជុំគ្នាប្រារព្ធទិវាសិទ្ធិមនុស្ស១០ឆ្នូ ក្នុងមួយថ្ងៃនេះ?

៣. ប្រសិនបើការជួបជុំរបស់សង្គមស៊ីវិល ដែលបំពានវិធានការសុវត្ថភាពរបស់រដ្ឋាភិបាលនេះ បង្កហានិភ័យដល់សង្គមពាក់ព័ន្ធការរីករាលដាលនៃការឆ្លង COVID-19 ចូលក្នុងសហគមន៍ តើអ្នកណាជាអ្នកទទួលខុសត្រូវ?

៤. ក្នុងកាលៈទេសៈដ៏លំបាកដែលកម្ពុជាកំពុងទទួលរងការវាយប្រហារពី COVID-19 នាពេលនេះ តើសង្គមស៊ីវិលទាំងនេះអាចរួមគ្នាធ្វើសកម្មភាពជាមួយរដ្ឋាភិបាលក្នុងការទប់ស្កាត់ការរីករាលដាលនៃការឆ្លង COVID-19 នេះចូលដល់សហគមន៍ បានដែរឬទេ ជំនួសឱ្យការជួបជុំគ្នាដែលអាចបង្កជាហានិភ័យដល់សង្គម ដើម្បីធានាបាននូវសិទ្ធិជាមូលដ្ឋានរបស់ពលរដ្ឋ គឺសិទ្ធិរស់រានមានជីវិត?

គំនិតសម្រាប់ពិចារណា៖

១. "សកម្មភាពដែលបម្រើឱ្យប្រយោជន៍សង្គមនិងមនុស្សជាតិ គឺជាសកម្មភាពលើកស្ទួយសិទ្ធិមនុស្ស តែផ្ទុយទៅវិញសកម្មភាពដែលបង្កហានិភ័យដល់សង្គមនិងមនុស្សជាតិ មិនមែនជាសកម្មភាពលើកស្ទួយសិទ្ធិមនុស្សនោះទេ តែអាចជាអំពើល្មើសច្បាប់”

២. “ផ្អែកលើបរិបទសង្គមនិងប្រវត្តិសាស្រ្តរបស់កម្ពុជា ប្រជាជាតិកម្ពុជាមិនត្រូវការប្រជាធិបតេយ្យបែបអាត្មានិយមដូចនៅលោកខាងលិចនោះទេ Individualist Democracy ដែលយកប្រយោជន៍និងសិទ្ធិបុគ្គលជាធំ គឺកម្ពុជាត្រូវការប្រជាធិបតេយ្យសមូហភាពនិយមបែបអាស៊ី Collective Democracy ដែលយកប្រយោជន៍សមូហភាពនិងប្រយោជន៍ជាតិរួមជាធំ”៕