(ភ្នំពេញ)៖ ក្រសួងសុខាភិបាល សម្រេចផ្អាកដំណើរការជាបណ្ដោះអាសន្ន អគារកាណាឌីយ៉ា ផ្លូវមុន្នីវង្ស និងធនាគារ កាថេ យូណាយធីត សាខាផ្លូវសម្ដេចប៉ាន រាជធានីភ្នំពេញ បន្ទាប់ពីមានករណីឆ្លងចូលសហគមន៍ ០២នាក់ថ្មី ក្នុងនោះម្នាក់ជាបុគ្គលិកធនាគារកាថេយូណាយធីត។

សូមបញ្ជាក់ថា នៅថ្ងៃនេះក្រសួងសុខាភិបាលបានរកឃើញអ្នកឆ្លងវីរុសកូវីដ១៩ថ្មីចំនួន ២នាក់ ក្នុងនោះស្ត្រីជនជាតិខ្មែរអាយុ ២៣ឆ្នាំ មានអាសយដ្ឋានរស់នៅសង្កាត់វាលស្បូវ ខណ្ឌច្បារអំពៅ រាជធានីភ្នំពេញ ជាភរិយាអនុប្រធាននាយកដ្ឋានពន្ធនាគារ នៃក្រសួងមហាផ្ទៃ និងស្ត្រីជនជាតិខ្មែអាយុ ២១ឆ្នាំ មានអាសយដ្ឋានរស់នៅសង្កាត់វាលស្បូវ ខណ្ឌច្បារអំពៅរាជធានីភ្នំពេញ និងជាបុគ្គលិកធនាគារកាថេយូណាយធីត រាជធានីភ្នំពេញ។

បច្ចុប្បន្នស្ត្រីទាំង២នាក់ ត្រូវបានឲ្យព្យាបាលក្នុងមន្ទីរពេទ្យមិត្តភាពខ្មែរ សូវៀត រាជធានីភ្នំពេញ៕