(អន្តរជាតិ)៖ មន្ត្រីបោះឆ្នោតកំពូលរបស់រដ្ឋ Georgia បាននិយាយថា រដ្ឋរបស់ខ្លួននឹងរាប់សន្លឹកឆ្នោតនៅក្នុងការបោះឆ្នោតប្រធានាធិបតី កាលពីថ្ងៃទី០៣ ខែវិច្ឆិកា ឡើងវិញទាំងអស់ដោយដៃផ្ទាល់។ នេះបើយោងតាមការចុះផ្សាយរបស់ CNA នៅថ្ងៃទី១២ ខែវិច្ឆិកា ឆ្នាំ២០២០។

បេក្ខភាពបក្សប្រជាធិបតេយ្យ គឺលោក Joe Biden បានទទួលបានសំឡេងគាំទ្រច្រើនជាង ២៧០ ដែលវាលើសពីគ្រប់គ្រាន់ដើម្បីទទួលបានតំណែងជាប្រធានាធិបតីអាមេរិកថ្មី។ ការឈ្នះចុងក្រោយរបស់លោក Joe Biden គឺនៅរដ្ឋ Pennsylvania បន្ទាប់ពីការរាប់សន្លឹកឆ្នោតរយៈពេល ៤ថ្ងៃ ដែលបានអូសបន្លាយយូរដោយសារសន្លឹកឆ្នោតតាមអ៉ីមែល។ ការឈ្នះបន្ថែមសម្រាប់រដ្ឋ Georgia នឹងកាន់តែបន្ថែមនូវជ័យជម្នះសម្រាប់លោក Joe Biden ។

យ៉ាងណាមិញប្រធានាធិបតី លោក ដូណាល់ ត្រាំ មកពីបក្សសាធារណរដ្ឋ បានបដិសេធមិនទទួលស្គាល់ ដោយបាននិយាយថាការបោះឆ្នោតនេះត្រូវបានបំផ្លាញដោយការក្លែងបន្លំ។

ការរាប់សន្លឹកឆ្នោតនៅរដ្ឋ Georgia បានបង្ហាញឱ្យឃើញថាលោក Joe Biden នាំមុខលោក Trump ដោយសំឡេងគាំទ្រត្រឹមតែ ១៤,១០១ សន្លឹក ក្នុងចំណោម ៥ លាននៅទូទាំងរដ្ឋ។ រដ្ឋមន្រ្តីក្រសួងការបរទេសរដ្ឋ Georgia លោក Brad Raffensperger បានថ្លែងនៅក្នុងសន្និសីទសារព័ត៌មានថា ដោយមានសម្លេងឆ្នោតមានភាពប្រកៀកប្រកិតគ្នា ដូច្នេះវាចាំបាច់ត្រូវមានការរាប់ឡើងវិញ។

លោក Raffensperger បាននិយាយថា៖ «ពិតជាត្រូវធ្វើការរាប់ឡើងវិញដោយដៃផ្ទាល់ ពីព្រោះគម្លាតឈ្នះគឺតិចតួច។ យើងចង់ចាប់ផ្តើមការរាប់នេះ មុនសប្តាហ៍នេះផុតទៅ»។ លោកបានមានប្រសាសន៍ថា៖ «ប្រជាជននឹងត្រូវធ្វើការច្រើនម៉ោងបន្ថែមទៀត ក្នុងរយៈពេលប៉ុន្មានសប្តាហ៍ខាងមុខនេះ»៕