(វ៉ាស៊ីនតោន)៖ ប្រធានាធិបតីអាមេរិកលោក ដូណាល់ ត្រាំ បានវិលត្រឡប់មកសេតវិមានវិញហើយ បន្ទាប់ពីបានចាកចេញពីមន្ទីរពេទ្យយោធាជាតិ Walter Reed នៅ​ជាយ​ក្រុង Washington នៃ​តំបន់ Bethesda ​រដ្ឋ Maryland ដែលជាកន្លែងគាត់ទទួលការព្យាបាលជំងឺ ​COVID-19 នៅទីនោះ។ នេះបើយោងតាមការចុះផ្សាយរបស់ CGTN នៅថ្ងៃទី០៦ ខែតុលា ឆ្នាំ២០២០។

លោក ដូណាល់ ត្រាំ បានចេញពីមន្ទីរពេទ្យនៅថ្ងៃច័ន្ទ (ម៉ោងនៅអាមេរិក) បន្ទាប់ពីស្ថានភាពសុខភាពរបស់គាត់ត្រូវបានគេរាយការណ៍ថា មានភាពប្រសើរឡើង។ គាត់បានដើរចេញពីមន្ទីរពេទ្យ ហើយលើកមេដៃឡើងដោយនិយាយថា «អរគុណ» បន្ទាប់មកលោកបានឡើងជិះឧទ្ធម្ភាគចក្រប្រធានាធិបតី ដើម្បីធ្វើដំណើរទៅកាន់សេតវិមានវិញ។

ក្រុមវេជ្ជបណ្ឌិតនិយាយថា ប្រធានាធិបតីនឹងត្រូវត្រួតពិនិត្យសុខភាពយ៉ាងប្រុងប្រយ័ត្នគ្រប់ម៉ោងទាំងអស់ ដោយសាររោគសញ្ញារបស់ប្រធានាធិបតីមិនបានបាត់ទាំងស្រុងទេ។ អ្នកសង្កេតការណ៍ខ្លះបានសម្តែងការព្រួយបារម្ភចំពោះការចាកចេញរបស់លោកប្រធានាធិបតីភ្លាមៗពីមន្ទីរពេទ្យ ពោលគឺត្រឹមតែ ៣ថ្ងៃប៉ុណ្ណោះ បន្ទាប់ពីលោកបានចូលព្យាបាល៕