(ភ្នំពេញ)៖ ព្យុះថ្មីនេះ ជាព្យុះទី១៨ ឈ្មោះ ម៉ូឡាវ ( MOLAVE ) កើតឡើងនៅព្រឹកថ្ងៃទី២៦ ខែតុលា ឆ្នាំ២០២០ នៅសមុទ្រចិនខាងត្បូង។ ព្យុះនេះ មានទិសដៅឆ្ពោះទៅប្រទេសវៀតណាម ត្រង់ចំណុចក្វាងងៃ រួចថតថយឥទ្ធិពលជាបន្តបន្ទាប់ ពេលឆ្លងកាត់ប្រទេសឡាវ និងប្រទេសថៃ នាថ្ងៃទី២៩ ខែតុលា ឆ្នាំ២០២០។ ជ្រលងវិសម្ពាធ និងសម្ពាធទាប ម៉ូឡាវ មានឥទ្ធិពល មកលើប្រទេសកម្ពុជា នៅថ្ងៃទី២៨-២៩ ខែតុលា ឆ្នាំ២០២០។ នេះបើតាមសេចក្តីជូនដំណឹងរបស់ក្រសួងធនធានទឹក និងឧតុនិយម។
សេចក្តីជូនដំណឹង បន្តថា លក្ខណៈបែបនេះ នឹងធ្វើឲ្យបណ្តារាជធានីខេត្តមួយចំនួន នៅភាគខាងក្រោម និងជាប់ព្រំដែនវៀតណាម ភ្លៀង នៅបន្តមាន ក្នុងកម្រិតពីតិច ទៅមធ្យម រហូតដល់ថ្ងៃទី២ ខែវិច្ឆិកា។ តែសម្រាប់ពីថ្ងៃទី២៨ ដល់ថ្ងៃទី២៩ ខែតុលា ពិសេសភាគពាយ័ព្យ នឹងមានភ្លៀងធ្លាក់រាយប៉ាយ ក្នុងកម្រិតបរិមាណពីមធ្យម ទៅច្រើន។
ដោយឡែក បណ្តាខេត្ត ជាប់ជួរភ្នំដងរែក និងខ្ពង់រាបឦសាន ត្រូវបានក្រសួងធនធានទឹក និងឧតុនិយម ប្រកាសថា ភ្លៀងនៅតែបន្តមានក្នុងកម្រិតពីតិច ទៅបង្គួរ រហូតដល់ថ្ងៃទី២ ខែវិច្ឆិកា តែច្រើនលាយឡំនឹងខ្យល់ខ្លាំង នៅថ្ងៃទី២៨-២៩ ខែតុលា ឆ្នាំ២០២០។
ចំពោះតំបន់មាត់សមុទ្រ ក៏ត្រូវបានក្រសួងធនធានទឹក និងឧតុនិយម ព្យាករថា នឹងអាចមានភ្លៀងធ្លាក់រាយប៉ាយ នៅក្នុងកម្រិតបរិមាណ ពីតិច ទៅបង្គួរ។
ក្រសួងធនធានទឹក និងឧតុនិយម ក៏បានប្រកាសអំពាវនាវដល់ក្រសួង ស្ថាប័នពាក់ព័ន្ធ អាជ្ញាធរដែនដី និងសាធារណជន ពិសេសបងប្អូនប្រជាពលរដ្ឋ នៅតំបន់ជួរភ្នំដងរែក ខ្ពង់រាបឦសាន និងបណ្តាខេត្តនៅតំបន់វាលទំនាប សូមបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ៕
