(ភ្នំពេញ)៖ ព្រឹត្តិប័ត្រព័ត៌មាន និងព្យាករណ៍កម្ពស់ទឹករបស់ក្រសួងធនធានទឹក និងឧតុនិយម បង្ហាញថា កម្ពស់ទឹកទន្លេ ទាំង ៨ស្ថានីយជលសាស្ត្រ គិតត្រឹមម៉ោង ៧ព្រឹក ថ្ងៃទី១៩ ខែតុលា ឆ្នាំ២០២០ បានឡើងតិចតួច បើធៀបនឹងថ្ងៃទី១៨ ខែតុលា ឆ្នាំ២០២០។
ក្រសួងធនធានទឹក និងឧតុនិយម បានប្រកាសថា កម្ពស់ទឹកនៅទន្លេមេគង្គ-ស្ទឹងត្រែង ទន្លេមេគង្គ-ក្រចេះ ទន្លេមេគង្គ-កំពង់ចាម ទន្លេបាសាក់-ចតុមុខ ទន្លេមេគង្គ-អ្នកលឿង ទន្លេបាសាក់-កោះខែល ទន្លេសាប-ព្រែកក្តាម និងបឹងទន្លេសាប-កំពង់ហ្លួង គឺកម្ពស់ទឹក នៅថ្ងៃទី១៩ ខែតុលានេះ ទោះបីឡើងតិចតួចមែន តែស្ថិតនៅក្រោមកម្ពស់ប្រុងប្រយ័ត្នឆ្ងាយណាស់។
យ៉ាងណាក៏ដោយ ព្រឹត្តិប័ត្រព័ត៌មាន និងព្យាករណ៍កម្ពស់ទឹករបស់ក្រសួងធនធានទឹក និងឧតុនិយម បានបង្ហាញនូវការព្យាករណ៍កម្ពស់ទឹក តាមបណ្តាស្ថានីយជលសាស្ត្រ ចំនួន ៧កន្លែង នៅថ្ងៃទី២០ ថ្ងៃទី២១ និងថ្ងៃទី២២ ខែតុលា ឆ្នាំ២០២០ គឺទឹកទន្លេ ទាំងទន្លេមេគង្គ ទាំងទន្លេបាសាក់ និងទាំងទឹកទន្លេសាប នឹងបន្តឡើងតិចតួចទៀត តែក៏ស្ថិតនៅក្រោមកម្រិតកម្ពស់ទឹកប្រុងប្រយ័ត្នច្រើននៅឡើយដែរ៕
