(ភ្នំពេញ)៖ ក្រសួងធនធានទឹក និងឧតុនិយម បានប្រកាសថា នាព្រឹកថ្ងៃទី១៩ ខែតុលានេះ កម្ពស់ទឹកស្ទឹងព្រែកត្នោត បានបន្តស្រកចុះ ០,១០ ម៉ែត្រ ធៀបនឹងពេលល្ងាចថ្ងៃម្សិលមិញ។
ក្រសួង បានប្រកាសថា ស្ថានភាពកម្ពស់ទឹកស្ទឹងព្រែកត្នោត នៅសំណង់ទ្វារទឹកទំនប់អាង ៧មករា នាថ្ងៃទី១៩ ខែតុលា ឆ្នាំ២០២០ វេលាម៉ោង ៧:៣០ នាទីព្រឹក៖
- កម្ពស់ទឹកខាងមុខទ្វារ ៥,៤០ ម៉ែត្រ ស្រកចុះ ១,២៧ ម៉ែត្រ ធៀបនឹងកម្ពស់ទឹកអតិបរិមា ៦,៦៧ ម៉ែត្រ កាលពីថ្ងៃទី១៤ ខែតុលា ឆ្នាំ២០២០
- កម្ពស់ទឹកហូរលើទំនប់បង្ហៀរ ០,៦០ ម៉ែត្រ
- កម្ពស់ទឹកខាងក្រោយទ្វារ ៨,២០ ម៉ែត្រ។
សូមរម្លឹកថា ជំនន់ស្ទឹងព្រែកត្នោត បានកើតឡើង កាលពីយប់ថ្ងៃទី១៣ ខែតុលា ឆ្នាំ២០២០ បណ្តាលឲ្យលិចផ្ទះប្រជាពលរដ្ឋ នៅជិតៗស្ទឹងព្រែកត្នោត ក្នុង ៥សង្កាត់ នៅខណ្ឌដង្កោ រាជធានីភ្នំពេញ រួមមាន៖ សង្កាត់រលួស សង្កាត់ព្រែកកំពឹស សង្កាត់គងនយ សង្កាត់សាក់សំពៅ និងសង្កាត់ស្ពានថ្ម។ ប្រជាពលរដ្ឋរាប់រយគ្រួសារ ត្រូវបានជម្លៀសពីផ្ទះលិចទឹក ទៅកាន់ទីទួលសុវត្ថិភាព៕
