(បាត់ដំបង)៖ ក្រសួងធនធានទឹក និងឧតុនិយម បានឲ្យដឹងនៅថ្ងៃទី១៦ ខែតុលានេះថា ការដ្ឋានជួសជុលបិទទំនប់បាសាក់ នៅថ្ងៃ១៥ ខែតុលា ឆ្នាំ២០២០ ដែលដឹកនាំដោយឯកឧត្តម ជួន ប៊ិតថុល អនុរដ្ឋលេខាធិការ នៃក្រសួងធនធានទឹក និងឧតុនិយម ក្រុមការងារបានគ្រោងបញ្ចប់បិទកន្លែងដាច់ធំទី១ តែនៅពេលល្ងាចមានភ្លៀងធ្លាក់ច្រើន រអិលគ្រឿងចក្រមិនអាចធ្វើបាន គួបផ្សំកម្រិតទឹកក្នុងអាងឡើងផង ធ្វើឲ្យដាច់ទំនប់បន្ថែមទៀតប្រមាណ ៥ម៉ែត្រ។

ក្រសួងធនធានទឹក បានបន្ថែមថា នៅព្រឹកថៃ្ងនេះមេឃកំពុងបន្តមានភ្លៀងធ្លាក់នៅឡើយ ក្រុមការងារបានសម្រុកដឹកថ្មមកស្តុកឲ្យច្រើនដើម្បីទំលាក់។ ទំនប់​បាសាក់ ស្ថិតក្នុង​ឃុំ​បាសាក់ ស្រុក​រុក្ខ​គិរី ខេត្តបាត់ដំបង មាន​សមត្ថភាពរក្សា​ទឹក​ទុក​បានប្រមាណ​ជា ២០លាន​ម៉ែត្រគូប៕​