(ភ្នំពេញ)៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នារសៀលថ្ងៃទី១៤ ខែតុលា ឆ្នាំ២០២០ បានជួបសន្ទនាតាមរយៈទូរគមនាគមន៍ ជាមួយនឹងលោកជំទាវ លីនដា រីណូ (LINDA Reynois)សមាជិកព្រឹទ្ធសភា និងជារដ្ឋមន្ត្រីក្រសួងការពារជាតិអូស្ត្រាលី ស្តីពី ការពង្រឹងពង្រីកកិច្ចសហប្រតិបត្តិការ រវាងក្រសួងការពារជាតិទាំងពីរកម្ពុជា-អូស្ត្រាលី និងវិធានការនៃការទប់ស្កាត់កូវីដ-១៩ (Covid-19)។
ក្នុងជំនួបសន្ទនាតាមទូរសព្ទ័នាពេលនោះ លោកជំទាវ លីនដា រីណូ (LINDA Reynois) បានសំដែងការចូលរួមសោកស្តាយចំពោះការពលីជីវិតកងទ័ពកម្ពុជាម្នាក់ នៅប្រទេសម៉ាលី និងផលប៉ះពាល់ដោយសារខ្យល់ព្យុះដែលកំពុងកើតមានឡើងនាពេលនេះ និងបានចូលរួមអបអរសាទរចំពោះកម្ពុជា ដែលមានដំណោះស្រាយយ៉ាងល្អ ក្នុងការទប់ស្កាត់ការរីករាលដាលនៃជម្ងឺកូវីដ-១៩នេះផងដែរ។ លោកជំទាវ រដ្ឋមន្ត្រីក្រសួងការពារជាតិអូស្ត្រាលី បានបញ្ជាក់ជាថ្មីម្តងទៀត ចំពោះការប្តេជ្ញាចិត្ត ក្នុងការរក្សានូវតួនាទីជាស្នូលរបស់អាស៊ាននៅក្នុងនិម្មាបណកម្មសន្តិសុខតំបន់ ក៏ដូចជាជំរុញកិច្ចសហប្រតិបត្តិការ ក្នុងក្របខណ្ឌកិច្ចប្រជុំរដ្ឋមន្ត្រីការពារជាតិអាស៊ានបូក។ ជាមួយគ្នានេះដែរ លោកជំទាវក៏បានថ្លែងអំណរគុណចំពោះ សម្តេចពិជ័យសេនា និងកម្ពុជា ដែលបានគាំទ្រឲ្យមានកិច្ចប្រជុំរដ្ឋមន្ត្រីការពារជាតិអាស៊ានបូកអូស្ត្រាលី លើកទី១ ដែលបានធ្វើកន្លងទៅ ហើយផ្អែកលើជោគជ័យនេះ យើងនឹងបន្តនូវកិច្ចប្រជុំនេះតទៅទៀត។ លោកជំទាវរដ្ឋមន្ត្រី បានលើកឡើងអំពីការធ្វើបច្ចុប្បន្នភាព នូវឯកសារយុទ្ធសាស្ត្រការពារជាតិរបស់អូស្ត្រាលី ដែលអូស្ត្រាលីទើបបានធ្វើបច្ចុប្បន្នភាព ដែលក្នុងនោះបានបញ្ជាក់អំពីគោលនយោបាយនៅក្នុងតំបន់អាស៊ីប៉ាស៊ីភិច ហើយក្នុងគោលនយោបាយនោះ អូស្ត្រាលីគិតថា នៅក្នុងក្របខណ្ឌ ក៏ដូចជាស្ថានភាពដែលមានជម្ងឺឆ្លងកូវីដ១៩នេះ គឺមានសារៈសំខាន់ណាស់សម្រាប់កម្ពុជា និងអូស្ត្រាលី ត្រូវធ្វើកិច្ចសហប្រតិបត្តិការរួមគ្នា ដើម្បីធ្វើការងារផ្សេងៗបម្រើឲ្យការរក្សាសន្តិសុខក្នុងតំបន់ ហើយតាមរយៈការធ្វើបច្ចុប្បន្នភាពនូវឯកសារយុទ្ធសាស្ត្រការពារជាតិអូស្ត្រាលីនេះ គឺបានបញ្ជាក់ថា៖ អូស្ត្រាលីនឹងក្លាយជាដៃគូមួយ ដែលកាន់តែមានសមត្ថភាពថែមទៀត ដើម្បីចូលរួមក្នុងការដោះស្រាយបញ្ហាសន្តិសុខនៅក្នុងតំបន់។ ក្នុងនោះអូស្ត្រាលីបានលើកឡើងអំពីគំនិតផ្តួចផ្តើមជាច្រើន ហើយគំនិតផ្តួចផ្តើមទាំងនោះ ក៏បានផ្តល់ផលប្រយោជន៍ដល់កម្ពុជាផងដែរ ក៏ដូចជា ការផ្តល់អាហារូបករណ៍ការហ្វឹកហ្វឺនផ្នែកភាសាអង់គ្លេស និងឱកាសផ្សេងៗទៀត ក្នុងកិច្ចសហប្រតិបត្តិការក្នុងវិស័យរក្សាសន្តិភាព វិស័យការពារជម្ងឺឆ្លងជាដើម។
លោកជំទាវ បានបញ្ជាក់ថា អូស្ត្រាលី មានក្តីរីករាយណាស់ ដែលមន្ត្រីយោធាអូស្ត្រាលី បានចូលរួមរៀបចំសៀវភៅស ការពារជាតិកម្ពុជាផងដែរ។
សម្តេចពិជ័យសេនា ទៀ បាញ់ បានថ្លែងអំណរគុណចំពោះ លោកជំទាវ លីនដា រីណូ (LINDA Reynois) ដែលបានផ្តួចផ្តើមធ្វើកិច្ចសន្ទនាតាមរយៈទូរគមនាគមន៍ ក្នុងគោលបំណង នៃកិច្ចសហប្រតិបត្តិការ ប្រយុទ្ធប្រឆាំងទៅនឹងការរីករាលដាលនៃជម្ងឺកូវីដ-១៩ និងពង្រឹងការថែរក្សា ការប្រាស្រា័យទាក់ទង ដែលកិច្ចប្រជុំធម្មតាមិនអាចប្រព្រឹត្តទៅបាន ស្របពេលដែលប្រទេសក្នុងតំបន់ និងលើពិភពលោកកំពុងតែជួបប្រទះនូវការប្រឈមបញ្ហានៃជម្ងឺកូវីដ-១៩ជាសកលនេះ។
សម្តេចពិជ័យសេនា បានបញ្ជាក់ថា ប្រការនេះ ភាគីទាំងពីរ គួរមានមធ្យោបាយ និងនីតិវិធីការពង្រឹងជាដៃគូទ្វេភាគី និងកិច្ចសហប្រតិការលើគ្រប់វិស័យ ក្នុងការសហការផ្លាស់ប្តូរបទពិសោធន៍ បច្ចេកទេស ជំនាញវិទ្យាសាស្ត្រ សម្រាប់សង្គ្រោះបន្ទាន់លើផ្នែកសុខាភិបាលសាធារណៈ ក្នុងការប្រយុទ្ធប្រឆាំងនឹងការរីករាលដាលនៃជម្ងឺកូវីដ-១៩នេះ ដោយផ្តោតលើវិស័យសំខាន់ៗ ដែលឆ្លុះបញ្ចាំងពីផលប្រយោជន៍ ធានាឲ្យបានសន្តិភាព សន្តិសុខ ស្ថេរភាព និងការស្តារឡើងវិញផ្នែកសង្គមសេដ្ឋកិច្ច ដោយឈរលើគោលការណ៍សមភាព និងផលប្រយោជន៍ និងគោរពគ្នាទៅវិញទៅមក។
សម្តេចពិជ័យសេនា ក៏ថ្លែអំណរគុណចំពោះក្រសួងការពារជាតិអូស្ត្រាលី ដែលបានជួយបណ្តុះបណ្តាលកសាងសមត្ថភាពដល់មន្ត្រីសង្កេតការណ៍យោធា ក្របខណ្ឌអង្គការសហប្រជាជាតិ និងជួយបណ្តុះបណ្តាលផ្នែកភាសាអង់គ្លេសទាំងនៅកម្ពុជា និងនៅអូស្ត្រាលី។ ទាំងនេះបានបង្ហាញឲ្យឃើញនូវកិច្ចសហប្រតិបត្តិការដ៏ល្អរវាងកងទ័ពទាំងពីរលើគ្រប់វិស័យ ហើយយើងនឹងខិតខំពង្រឹងកិច្ចសហប្រតិបត្តិការឲ្យកាន់តែជិតស្និតថែមទៀត ទាំងក្នុងតំបន់និងអន្តរជាតិ និងគាំទ្រគ្នាទៅវិញទៅមក៕
