(អន្តរជាតិ)៖ ប្រទេសថៃបានហាមឃាត់ការប្រមូលផ្តុំមនុស្ស ៥នាក់ ឬច្រើនជាងនេះ និងការផ្សព្វផ្សាយព័ត៌មាន ឬសារតាមអ៉ីនធឺណេត ដែលអាចបង្កគ្រោះថ្នាក់ដល់សន្តិសុខជាតិ បន្ទាប់ពីក្រឹត្យបន្ទាន់មួយត្រូវបានប្រកាសដើម្បីបញ្ចប់ការតវ៉ារបស់ក្រុមបាតុករ។ នេះបើយោងតាមការចុះផ្សាយរបស់បាងកកប៉ុស្តិ៍នៅថ្ងៃទី១៥ ខែតុលា ឆ្នាំ២០២០។

ការតវ៉ានៅប្រទេសថៃបានកើតឡើងអស់រយៈពេល ៣ខែ រួចមកហើយ ខណៈកាលពីល្ងាចថ្ងៃពុធកន្លងទៅនេះ ក្រុមអ្នកតវ៉ាបានបោះជំរំនៅខាងក្រៅវិមានរដ្ឋាភិបាល ដើម្បីទាមទារឱ្យនាយករដ្ឋមន្ត្រីលោក ប្រាយុទ្ធ ចានអូចា ចុះចេញពីតំណែង។

ការប្រកាសនេះត្រូវបានអមដោយឯកសារដែលដាក់ចេញនូវវិធានការណ៍ ដែលចូលជាធរមានចាប់ពីម៉ោង ៤ព្រឹក ដើម្បីហាមឃាត់ការជួបជុំធំៗ និងអនុញ្ញាតឱ្យអាជ្ញាធរហាមឃាត់ប្រជាជនមិនឱ្យចូលក្នុងតំបន់ណាមួយដែលពួកគេបានកំណត់។

បន្ទាប់ពីក្រឹត្យបន្ទាន់បានចូលជាធរមាន ប៉ូលីសប្រឆាំងកុបកម្មក៏បានចាប់ផ្ដើមធ្វើសកម្មភាពលើអ្នកតវ៉ា ដែលបានបោះជំរំក្រៅវិមានរដ្ឋាភិបាលកាលពីយប់ថ្ងៃពុធ ប៉ុន្តែមនុស្សរាប់ពាន់នាក់ដែលបានតវ៉ានៅទីនោះបានចាកចេញរួចទៅហើយ។ ប្រភពនិយាយថា យ៉ាងហោចណាស់មេដឹកនាំបាតុកម្ម ៣នាក់ ត្រូវបានចាប់ខ្លួន ប៉ុន្តែខាងប៉ូលីសមិនបានធ្វើអត្ថាធិប្បាយលម្អិតភ្លាមៗនោះទេ៕