(កំពង់ឆ្នាំង)៖ នៅថ្ងៃទី៩ ខែតុលា ឆ្នាំ២០២០ ឯកឧត្តម ស្រ៊ន សំឫទ្ធី អភីបាលរងខេត្តកំពង់ឆ្នាំង បានអញ្ជើញចូលរួមវេទិការបស់ក្រុមការងាររាជរដ្ឋាភិបាលចុះមូលដ្ឋានស្រុកសាមគ្គីមានជ័យ ដើម្បីដោះស្រាយបញ្ហារបស់ប្រជាពលរដ្ឋឃុំធ្លកវៀន និងឃុំខ្នាឆ្មារ នៅក្នុងបរិវេណវត្តសុរិយោ ភូមិប្រក្លូត ឃុំធ្លកវៀន ស្រុកសាមគ្គីមានជ័យ ខេត្តកំពង់ឆ្នាំង។

វេទិកាបានប្រព្រឹត្តទៅក្រោមអធិបតីភាពឯកឧត្ដម ចាន់ ដារ៉ុង រដ្ឋលេខាធិការក្រសួងអភិវឌ្ឍន៍ជនបទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកសាមគ្គីមានជ័យ ដោយមានការចូលរួមពីឯកឧត្តម លោកជំទាវ អនុប្រធានក្រុមការងារ និងសមាជិក សមាជិកា ក្រុមការងាររាជរដ្ឋាភិបាលចុះមូលដ្ឋានស្រុកសាមគ្គីមានជ័យ ថ្នាក់ដឹកនាំមន្ទីរជុំវិញខេត្ត អាជ្ញាធរស្រុក ឃុំ ភូមិ និងអ្នកពាក់ព័ន្ធ។

ក្នុ្ងងឪកាសនោះដែរ ឯកឧត្ដម ចាន់ ដារ៉ុង បានលើកឡើងអំពីសមិទ្ធផលនានារបស់រាជរដ្ឋាភិបាល ជូនដល់ប្រជាពលរដ្ឋ និងដំណោះស្រាយពីបញ្ហា ក្តីកង្វល់របស់បងប្អូនប្រជាពលរដ្ឋដែលបានលើកឡើងក្នុងអង្គវេទិកាកន្លងមក ដែលក្រុមការងារបានចុះដោះស្រាយជូនរួចរាល់។

ក្នុងនោះ ក្រុមការងារទទួលបានបញ្ហា និងសំណូមពរដោយផ្ទាល់មាត់ និងលិខិតពីប្រជាពលរដ្ឋដែលបានចូលរួមមានចំនួន ១៧ ករណី ពាក់ព័ន្ធនឹងទំនាស់ដីធ្លីចំនួន ៣ករណី, វិស័យធនធានទឹកចំនួន ៤ករណី, ការតភ្ជាប់បណ្តាញអគ្គិសនីចំនួន ២ ករណី, សន្តិសុខសណ្តាប់ធ្នាប់ចំនួន ២ ករណី និងអភិវឌ្ឍន៍ជនបទចំនួន ៦ករណី ដោយត្រូវបានជំនាញស្រាយបំភ្លឺជូននៅក្នុងអង្គវេទិកា។ ក្នុងនោះផងដែរក្រុមការងារបានទទួលយកសំណើ និងសំណូមពរដែលមិនទាន់ត្រូវបានដោះស្រាយ ដើម្បីកំណត់ពេលប្រជុំដោះស្រាយតាមករណីនីមួយៗនៅពេលក្រោយ។

ឯកឧត្តមបណ្ឌិត ចាន់ ដារ៉ុង បានធ្វើការផ្តាំផ្ញើដល់ប្រជាពលរដ្ឋទាំងអស់ត្រូវចូលរួមប្រុងប្រយ័ត្នឱ្យបានខ្ពស់ និងធ្វើអនាម័យជាប់ជាប្រចាំ ដោយអនុវត្តតាមការណែនាំរបស់ក្រសួងសុខាភិបាល ឱ្យបានត្រឹមត្រូវនូវវិធានការបង្ការ ការការពារ និងទប់ស្កាត់ការរីករាលដាលនៃជំងឺកូវីដ១៩ និងជំរុញឲ្យបងប្អូនអញ្ជើញទៅពិនិត្យឈ្មោះ និងចុះឈ្មោះបោះឆ្នោតឲ្យបានគ្រប់ៗគ្នា៕