(ភ្នំពេញ)៖ «សូមគោរព និងថ្លែងអំណរគុណដល់ពលរដ្ឋល្អដែលបានរួមសកម្មភាពសង្គម។ ឃើញរូបភាពប្រជាពលរដ្ឋយើងចូលរួមវេចខ្ចប់ ទុកដាក់សំរាមត្រឹមត្រូវ រហូតដល់ជួយលើកដាក់ចូលឡានដឹកជញ្ជូនសំរាមទៀត ពិតជារំភើបចិត្តខ្លាំង។ ព្រឹកនេះ ក៏មានដំណឹងល្អទៀត ដោយបងប្អូនកម្មករក្រុមហ៊ុន ស៊ីនទ្រី ប្រមាណជា ៣០០នាក់ ក្នុងចំណោមអ្នកកំពុងធ្វើកូដកម្ម បានភ្ញាក់រលឹក វិលត្រឡប់ចូលបំរើការងារវិញ»។ នេះជាសារលើកឡើងនៅគណនីហ្វេសប៊ុករបស់លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ នៅព្រឹកថ្ងៃទី១០ ខែតុលានេះ។
អ្នកនាំពាក្យរាជធានីបានបន្តថា៖ «សង្ឃឹមថា អ្នកនៅកំពុងពិចារណា សូមឆាប់សម្រេចចិត្តដូចអ្នកដទៃ រួចចូលមកចាប់ដៃគ្នាសំអាតភ្នំពេញរបស់យើង។
ជឿជាក់ថា ក្រោយភ្លៀង មេឃនឹងស្រឡះ! រួមគ្នាដើម្បីទីក្រុងយើងស្អាត!»។
សូមរម្លឹកថា ក្រុមកម្មករក្រុមហ៊ុនស៊ីនទ្រី ប្រមាណ ២១៥០នាក់ បានធ្វើកូដកម្ម មិនចេញប្រមូលសំរាម នៅរាជធានីភ្នំពេញ ចាប់តាំងពីថ្ងៃទី២ ខែតុលា ឆ្នាំ២០២០។ មូលហេតុក្រុមកម្មករទាមទារឲ្យក្រុមហ៊ុនទូទាត់ប្រាក់អតីតភាពការងារ និងប្រាក់អត្ថប្រយោជន៍ផ្សេងទៀត ដោយសារកម្មករ បារម្ភខ្លាច ពេលខាងមុខដ៏ខ្លីនេះ សាលារាជធានីភ្នំពេញ រៀបចំដេញថ្លៃរកក្រុមហ៊ុនថ្មីបន្ថែមទៀត មកប្រមូលសំរាម ហើយស៊ីនទ្រី មិនជាប់ ឬក៏ជាប់បានតែមួយតំបន់ ក៏ត្រូវកាត់រំសាយបុគ្គលិក។
ក៏ប៉ុន្តែក្រុមហ៊ុន ស៊ីនទ្រី និងសាលារាជធានីភ្នំពេញ ចាត់ទុកការទាមទាររបស់បងប្អូនកម្មករស៊ីនទ្រី ថាជាការទាមទារខុសច្បាប់ ព្រោះក្រុមហ៊ុន នៅដំណើរការនៅឡើយ៕
