(ភ្នំពេញ)៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល នៅរសៀល​ថ្ងៃទី១៦ ខែធ្នូ ឆ្នាំ២០២០នេះ បានបញ្ជាក់ឲ្យដឹងថា ប្រទេសកម្ពុជា បានបញ្ជាទិញវ៉ាក់សាំងទៅមជ្ឈមណ្ឌលកូវ៉ាក់ COVAX Facility)ចំនួន១លានដូស បន្ថែមលើចំនួនវ៉ាក់សាំងដែលកម្ពុជា នឹងអាចទទូលបាន២០%នៃចំនួនប្រជាជនកម្ពុជាពីមជ្ឈមណ្ឌលមួយនេះ។ ខាងក្រោមនេះ ជាការបញ្ជាក់របស់លោកជំទាវវេជ្ជបណ្ឌិត ឱ វណ្ណឌីន ដែលបានសរសេរនៅក្នុងគ្រុបតេលេក្រាម នាថ្ងៃរសៀលថ្ងៃនេះ៖

ការសរសេរនេះគឺមានការយល់ច្រឡំហើយណា។ ខ្ញុំសុំឲ្យម្ចាស់អត្ថបទនៅក្នុង Business9 នេះ មេត្តាធ្វើការកែតម្រូវជាបន្ទាន់។ ខ្ញុំសូមជម្រាបជូនថា កម្ពុជា បានបញ្ជាទិញវ៉ាក់សាំងទៅមជ្ឈមណ្ឌលកូវ៉ាក់ (COVAX Facility) ចំនួនមួយលានដូស បន្ថែមលើចំនួនវ៉ាក់សាំងដែលកម្ពុជា (ប្រសិនបើគ្មានការប្រែប្រួលទេនោះ) នឹងអាចទទូលបាន ២០%នៃចំនួនប្រជាជនកម្ពុជាសរុប (ដែលនឹងអាចទទួលបានជាបឋមក្នុងចំនួន ០៣%នៃ ២០%នៃចំនួនប្រជាជនកម្ពុជាសរុប ជាដំណាក់កាលៗ)។ 

វ៉ាក់សាំងដែលកម្ពុជានឹងទទួលបាន តម្រូវឲ្យមានការវាយតម្លៃគុណភាពនិងប្រសិទ្ធិភាពជាមុនដោយអង្គការសុខភាពពិភពលោក ទើបមជ្ឈមណ្ឌលកូវ៉ាក់ធ្វើការបែងចែក មកបណ្តាប្រទេសកំពុងអភិវឌ្ឍន៍ ដែលជាសមាជិករបស់មជ្ឈមណ្ឌលនេះ។ កម្ពុជានឹងទទួលបានវ៉ាក់សាំងនៅពេលណានោះ គឺមិនទាន់ដឹងបាននៅពេលនេះនៅឡើយទេ ដោយ អាស្រ័យលើមជ្ឈមណ្ឌលកូវ៉ាក់នឹងទទួលបានវ៉ាក់សាំងកូវីដ-១៩ នៅពេលណាដែរ ហើយអង្គការសុខភាពពិភពលោក បានវាយតម្លៃវ៉ាក់សាំងនោះជាមុននូវប្រសិទ្ធិភាព និងគុណភាពវ៉ាក់សាំងនោះឲ្យបានរួចរាល់ជាមុនដែរមុននឹងធ្វើការបែងចែក។

ដូច្នេះ ប្រសិនបើក្រុមហ៊ុនផលិតវ៉ាក់សាំងពីប្រទេសណាមួយ រួមទាំងប្រទេសចិនផងដែរនោះ អាចផលិតបានសម្រេចផលចុងក្រោយ ហើយផ្គត់ផ្គង់ទៅមជ្ឈមណ្ឌលកូវ៉ាក់តាមការឯកភាពគ្នាជាមុននោះ ហើយអង្គការសុខភាពពិភលោក ក៏បានវាយតម្លៃប្រសិទ្ធិភាព និងគុណភាពរួចរាល់ជាមុនដែរនោះៗសមភាពនៃការបែងចែក នឹងត្រូវបានធ្វើទៅតាមសភាពជាក់ស្តែង នៃចំនួនវ៉ាក់សាំងដែលទទួលបាន ដែលត្រូវបែងចែកឲ្យទៅបណ្តាប្រទេស ដែលជាសមា​ជិកដោយមជ្ឈមណ្ឌលកូវ៉ាក់នេះតែម្តង។

សូមកុំមានការពន្យល់ ឬបកស្រាយណាមួយ ដែលផ្ទុយទៅនឹងគោលការណ៍ដែលកម្ពុជា បានប្រកាន់យក ជាពិសេ​ស​សូមលោកអ្នក មេត្តាកុំលើកយកប្រសាសន៍ដ៏ខ្ពង់ខ្ពស់ របស់សម្តេចតេជោនាយករដ្ឋមន្រ្តី ដែលបានថ្លែងការណ៍ជូនបងប្អូនជនរួមជាតិនាព្រឹកថ្ងៃទី១៥ ខែធ្នូ ឆ្នាំ២០២០កន្លងមកនេះ មកបកស្រាយខុសដូច្នេះអីណា។ បើចង់ quoteប្រសាសន៍សម្តេចតេជោ សូមមេត្តាលើកយកចំណុចណាមួយទាំងស្រុងតែម្តង ចៀសវាងការសរសេរខុស បកស្រាយខុស ឬការភ័ន្តច្រឡំណាមួយដែលអាចកើតមាន ជាឧទាហ៌រណអត្ថបទដែលបានចុះផ្សាយដោយ Business9 នេះស្រាប់។

ខ្ញុំស្នើសុំឲ្យមានការកែតម្រូវជាបន្ទាន់លើបញ្ហានេះ ចៀសវាងការភ័ន្តច្រឡំ ឬការបង្កឲ្យមានបញ្ហាណាមួយលើកិច្ចសហប្រតិបត្តិការទ្វេភាគី ឬពហុភាគីជាមួយបណ្តាប្រទេសជាមិត្ត៕