(ភ្នំពេញ)៖ ព្រឹត្តិការណ៍ «រត់ដើម្បីសប្បុរសធម៌ជាមួយសាយ» បានចាប់ផ្តើម នៅថ្ងៃទី៦ ខែតុលា ឆ្នាំ២០២០ ដើម្បីស្វែងរកទឹកសប្បុរសធម៌ ជួយដល់មន្ទីរពេទ្យកុមារអង្គរ ខេត្តសៀមរាប។ គិតត្រឹមម៉ោង ៨ព្រឹកថ្ងៃទី២៣ ខែវិច្ឆិកា ឆ្នាំ២០២០ ព្រឹត្តិការណ៍ «រត់ដើម្បីសប្បុរសធម៌ជាមួយសាយ» ទទួលបានថវិកាជាង ៤០ម៉ឺនដុល្លារ ជួយដល់មន្ទីរពេទ្យកុមារអង្គរ ខេត្តសៀមរាប។
ព្រឹត្តិការណ៍ «រត់ដើម្បីសប្បុរសធម៌ជាមួយសាយ» គ្រោងបញ្ចប់ នៅថ្ងៃទី១៣ ខែមករា ឆ្នាំ២០២១ ហើយការរត់នេះ គឺលោក សាយ រត់តែម្នាក់ឯង តាមបណ្តោយផ្លូវជុំវិញព្រំដែនប្រទេសកម្ពុជា ក្នុងរយៈពេលសរុប ៩៩ថ្ងៃ។
នៅព្រឹកថ្ងៃចន្ទនេះ លោកសាយ បានរត់ចូលដល់មន្ទីរពេទ្យកុមារអង្គរ ក្នុងខេត្តសៀមរាហើយ។ ពិធីស្វាគមន៍នូវការរត់នេះ បានធ្វើឡើងយ៉ាងអធិកអធ័ម។
ក្នុងព្រឹត្តិការណ៍ «រត់ដើម្បីសប្បុរសធម៌ជាមួយសាយ» ក៏បានបង្កើតយុទ្ធនាការ «តោះលេងហ្គេម #១ដុល្លារ សម្រាប់កុមារកម្ពុជា» ចាប់ផ្តើមពីល្ងាចថ្ងៃទី១១ ខែវិច្ឆិកា ឆ្នាំ២០២០។ យុទ្ធនាការនេះ បានក្លាយទៅជាចលនាយ៉ាងផុសផុលនៅក្នុងបណ្តាញសង្គម facebook ដើម្បីជំរុញ និងបំផុសស្មារតីរបស់ប្រជាពលរដ្ឋខ្មែរទាំងអស់ ឲ្យចូលរួមទាំងអស់គ្នា ក្នុងការចំនួនទឹកប្រាក់ ១ដុល្លារ បរិច្ចាគមកកាន់មន្ទីរពេទ្យកុមារអង្គរ ដើម្បីបន្តដំណើរការប្រតិបត្តិក្នុងការផ្តល់សេវាពិនិត្យព្យាបាល និងថែទាំសុខភាពដល់កុមារកម្ពុជាតទៅមុខទៀត ខណៈពេលដែលមន្ទីរពេទ្យកុមារអង្គរ កំពុងតែជួបការលំបាកក្នុងការស្វែងរកមូលនិធិសប្បុរសជនទាំងក្នុង និងទាំងក្រៅប្រទេស។
ក្នុងកម្មវិធីផ្សាយផ្ទាល់តាមហ្វេសប៊ុក ពីព្រឹត្តិការណ៍ «រត់ដើម្បីសប្បុរសធម៌ជាមួយសាយ» នាព្រឹកនេះ បានប្រកាសពីចំនួនថវិកា ដែលទទួលបានពីសប្បុរសជន ដើម្បីប្រគល់ជូនមន្ទីរពេទ្យកុមារអង្គរ ដោយគិតត្រឹមម៉ោង ៨ព្រឹក ថ្ងៃទី២៣ ខែវិច្ឆិកា ឆ្នាំ២០២០ ទទួលបាន ៤០៥ ៥៧៩ដុល្លារ។ ក្នុងកម្មវិធីនាព្រឹកថ្ងៃចន្ទនេះ ក៏មានសប្បុរសជន កាកបាទក្រហមកម្ពុជា ខេត្តសៀមរាប ព្រមទាំងសហភាពសហព័ន្ធយុវជនកម្ពុជា ខេត្តសៀមរាប ជាដើម បានបរិច្ចាគថវិកា ប្រគល់ជូនលោក សាយ ហើយប្រគល់ជូនបន្តដល់មន្ទីរពេទ្យកុមារអង្គរ ផងដែរ។
មានអាយុ ៣០ឆ្នាំ លោក អ៊ួន បឋម ហៅសាយ ជាសិល្បករ បានចាប់ផ្ដើមរត់ ក្នុងព្រឹត្តិការណ៍ «រត់ដើម្បីសប្បុរសធម៌ជាមួយសាយ» ដោយចេញពីរាជធានីភ្នំពេញ នៅថ្ងៃទី៦ ខែតុលា ឆ្នាំ២០២០ ដែលចំថ្ងៃខួបកំណើត គម្រប់អាយុ ៣០ឆ្នាំរបស់លោក។
សូមរម្លឹកថា មន្ទីរពេទ្យកុមារអង្គរ បានបង្កើតឡើង នៅឆ្នាំ១៩៩៩ ដោយមានស្ថាបនិកជនជាតិជប៉ុន លោក ខេនរ៉ូ អីហ្ស៊ូ។ មន្ទីរពេទ្យកុមារអង្គរ បានជួយព្យាបាលកុមារក្រីក្រកម្ពុជា ដោយក្នុងមួយថ្ងៃ មានកុមារចន្លោះពី ៥០០ ទៅ ៦០០នាក់ ដែលទទួលសេវាព្យាបាលដោយឥតគិតថ្លៃ ក្នុងមន្ទីរពេទ្យ នៅទីរួមខេត្តសៀមរាបនេះ។
ដោយសារកំណើននៃអ្នកជំងឺ ចេះតែកើនឡើងឥតឈប់ឈរ ហើយការព្យាបាល ក៏មិនគិតលុយថែមទៀត ដូច្នេះមន្ទីរពេទ្យកុមារអង្គរ ត្រូវការធនធានហិរញ្ញវត្ថុ កាន់តែច្រើន ដើម្បីផ្គត់ផ្គង់រាល់ការចំណាយរបស់ខ្លួន។
ក្នុងដំណើរការកន្លងមក មិនខុសពីមន្ទីរពេទ្យគន្ធបុប្ផាប៉ុន្មានទេ គឺមន្ទីរពេទ្យកុមារអង្គរ ទទួលបានជំនួយពីសប្បុរសជនជាតិ និងអន្តរជាតិ ព្រមទាំងរាជរដ្ឋាភិបាល ដើម្បីជួយឲ្យមន្ទីរពេទ្យ មានលទ្ធភាពជួយកុមារកម្ពុជាយើង។
កន្លងមក មានខាងសណ្ឋាគារ ភោជនីយដ្ឋាន អង្គការ និងស្ថាប័នក្រុមហ៊ុនមួយចំនួន នៅខេត្តសៀមរាប បានរៀបចំព្រឹត្តិការណ៍ ឬកម្មវិធីសប្បុរសធម៌ជាច្រើន ដើម្បីរកថវិកា ជួយមន្ទីរពេទ្យ កុមារអង្គរ។ ក្រៅពីនេះ ខាងមន្ទីរពេទ្យផ្ទាល់ ក៏ធ្លាប់បានរៀបចំបុណ្យផ្កាសាមគ្គី រកថវិកា សម្រាប់ទ្រទ្រង់ ដល់មន្ទីរពេទ្យខ្លួនផងដែរ៕
