(ភ្នំពេញ)៖ នៅល្ងាចថ្ងៃទី១៦ ខែវិច្ឆិកា ឆ្នាំ២០២០ វេលាម៉ោង ៧:២៥ នាទី លោកជំទាវ ជា សិរី ឧបការីទេសាភិបាល និងជាអគ្គនាយកបច្ចេកទេសនៃធនាគារជាតិនៃកម្ពុជា នឹងអញ្ជើញចូលរួមវេទិកាគោលនយោបាយ Blockchain ពិភពលោក ប្រចាំឆ្នាំ២០២០ ដែលរៀបចំដោយអង្គការដើម្បីអភិវឌ្ឍន៍និងសហប្រតិបត្តិការសេដ្ឋកិច្ច តាមប្រព័ន្ធអនឡាញ។ 

វេទិកានេះត្រូវបានរៀបចំឡើងក្នុងគោលបំណងដើម្បីពិភាក្សានិងផ្លាស់ប្ដូរយោបល់អំពី ១/-គោលនយោបាយនានាពាក់ព័ន្ធនឹងបច្ចកវិទ្យា Blockchain និង Distributed Ledger ២/-រូបិយប័ណ្ណឌីជីថល ៣/-អត្តសញ្ញាណឌីជីថល ៤/-Asset tokenization និង ៥/-ការប្រសព្វរវាងបច្ចេកវិទ្យា Blockchain និងបច្ចេកវិទ្យាថ្មីៗ ដូចជា បញ្ញាសប្បនិម្មិត បណ្ដាញអុីនធឺណែតនៃសម្ភារ (Internet of things: ការតភ្ជាប់ប្រព័ន្ធអ៊ីនធឺណែតក្នុងវត្ថុប្រើប្រាស់ប្រចាំថ្ងៃសម្រាប់បញ្ជូននិងទទួលទិន្នន័យ)។ 

ឆ្លៀតក្នុងឱកាសនោះ លោកជំទាវ ឧបការីទេសាភិបាលនឹងអញ្ជើញធ្វើបទអន្តរាគមន៍តាមរយៈប្រព័ន្ធអនឡាញ សម្រាប់ប្រធានបទ ស្ដីពី “រូបិយប័ណ្ណក្នុងសតវត្សរ៍ទី២១៖ តើរូបិយប័ណ្ណឌីជីថលនិង Global stablecoins មានតួនាទីដូចម្ដេច?”។

វេទិកានេះក៏មានការចូលរួមពីរដ្ឋមន្ត្រី ថ្នាក់ដឹកនាំនៃធនាគារកណ្ដាល នាបណ្តាប្រទេសអភិវឌ្ឍន៍និងប្រទេសកំពុងអភិវឌ្ឍន៍ដទៃទៀត អ្មកជំនាញ បញ្ញវន្ត ក៏ដូចជាក្រុមហ៊ុនអន្តរជាតិនៅក្នុងវិស័យរូបិយប័ណ្ណឌីជីថលនេះផងដែរ៕