(សហរដ្ឋអាមេរិក)៖ ប្រធានាធិបតីអាមេរិក លោក ដូណាល់ ត្រាំ បានថ្លែងទៅកាន់គូប្រជែងរបស់ខ្លួនគឺលោក ចូ បៃដិន ដោយសរសេរនៅក្នុង Twitter ថា៖ «ចូ បៃដិន ឈ្នះពីព្រោះការបោះឆ្នោតនេះជាការរៀបចំ»។ ប៉ុន្តែនៅក្នុងការបង្ហោះនៅពេលក្រោយបន្ទាប់មកទៀត លោក ដូណាល់ ត្រាំ បានបដិសេធមិនទទួលស្គាល់ការបរាជ័យនេះទេ។

រ៉យទ័រនិងប្រព័ន្ធផ្សព្វផ្សាយផ្សេងទៀតបានរាយការណ៍ភ្លាមៗថា លោក ដូណាល់ ត្រាំ ហាក់ដូចជាបានទទួលស្គាល់ការឈ្នះរបស់លោក ចូ បៃដិន ជាលើកដំបូង ប៉ុន្តែគ្រាន់តែលោកនៅតែមិនទាន់ព្រមចុះចាញ់។

យ៉ាងណាមិញនៅក្នុងសារវីតទ័រមួយផ្សេងទៀតប្រហែលមួយម៉ោងកន្លះក្រោយមកលោក ត្រាំ បានបង្ហោះសារថែមទៀតថា «ចូ បៃដិន បានឈ្នះតែនៅក្នុងក្រសែភ្នែករបស់កាសែតបំភ្លើស។ ខ្ញុំមិនទទួលចុះចាញ់! យើងមានអ្វីត្រូវធ្វើជាច្រើនទៀត។ ការបោះឆ្នោតនេះជាការរៀបចំទុក។» ទោះជាយ៉ាងក្តីលោក បៃដិន មិនបានអត្ថាធិប្បាយលើធ្វីតធ័ររបស់លោក ត្រាំ ទេ។

លោក ដូណាល់ ត្រាំ និយាយម្តងហើយម្តងទៀតថាលោកនឹងបន្តការតស៊ូផ្នែកច្បាប់របស់លោកដោយលើកហេតុផលថាមានការក្លែងបន្លំនៅក្នុងការបោះឆ្នោតនៅក្នុងអាណត្តិនេះ៕