(ភ្នំពេញ)៖ ក្រសួងធនធានទឹក និងឧតុនិយម បានឲ្យដឹងនៅថ្ងៃទី១០ ខែវិច្ឆិកានេះថា យោងតាមការតាមដានស្ថានភាពអាកាសធាតុនៅកម្ពុជា ព្យុះទី ២១ ឈ្មោះ អេតូ (ETAU) បាននឹងកំពុងធ្វើដំណើរឆ្ពោះមកទិសខាងលិច។ ព្យុះនេះនឹងចូលដល់លើភាគខាងត្បូងប្រទេសវៀតណាម និងភាគខាងកើត ប្រទេសកម្ពុជាមុននឹងថមថយឥទ្ធិពលជាវិសម្ពាធនិងសម្ពាធទាបនៅថ្ងៃទី១០ ខែវិច្ឆិកា។
ស្ថានភាពបែបនេះនឹងធ្វើឲ្យកម្ពុជា ចុះត្រជាក់នៅតាមបណ្ដាលខេត្តនៅតំបន់វាលទំនាបកណ្ដាល មានសីតុណ្ហភាពអប្បបរមាពី ២១ ទៅ ២៣អង្សារសេ, បណ្ដាលខេត្តជាប់ជួរភ្នំដងរែក និងខ្ពងរាប់ឦសាន មានសីតុណ្ហភាពអប្បបរមាពី ២០ ទៅ ២១អង្សារសេ និងតំបន់មាត់សមុទ្រ មានសីតុណ្ហភាពអប្បបរមាពី ២២ ទៅ ២៣អង្សារសេ។
ជាមួយគ្នានេះ ក្រសួងធនធានទឹកបានឲ្យដឹងដែរថា ចាប់ពីថ្ងៃទី១១ ដល់ថ្ងៃទី១៧ ខែវិច្ឆិកា នឹងមានភ្លៀងធ្លាក់ រួមទាំងខ្យល់ រលកសមុទ្រខ្ពស់ៗផងដែរ ដែលទាមទារឲ្យប្រជាពលរដ្ឋមានការប្រុងប្រយ័ត្នចំពោះបាតុភូតធម្មជាតិដែលនឹងអាចកើតមានជាយថាហេតុណាមួយ៕
