(អន្តរជាតិ)៖ មេដឹកនាំនៃបណ្តាប្រទេសតូចធំមួយចំនួនបានចេញសារអបអរសាទរចំពោះលោក Joe Biden ដែលជាប់ឆ្នោតជាប្រធានាធិបតី និងលោកស្រី Kamala Harris ជាអនុប្រធានាធិបតីជាប់ឆ្នោតថ្មី។ ក៏ប៉ុន្តែ មិនមែនមេដឹកនាំជុំវិញពិភពលោកគ្រប់គ្នាសុទ្ធតែចេញមុខទទួលស្គាល់អ្នកឈ្នះនៃការបោះឆ្នោតប្រធានាធិបតីអាមេរិកឆ្នាំ ២០២០នោះទេ។

ក្នុងចំណោមមេដឹកនាំពិភពលោក ដែលធ្លាប់ប្រឈមនិងជាដៃគូជាមួយលោកប្រធានាធិបតី ដូណាល់ ត្រាំ ក្នុងរយៈពេល ៤ឆ្នាំ នៃការកាន់អំណាច គឺមានយ៉ាងហោចមេដឹកនាំសំខាន់ៗ៤រូប នៅរក្សាភាពស្ងៀមស្ងាត់ ហើយមិនបានបញ្ចេញសារអបអរអ្នកឈ្នះគឺលោក ចូ បៃដិន ដែលមិនទាន់ប្រកាសលទ្ធផលជាផ្លូវការនៅឡើយនោះទេ ក្នុងនោះរួមមាន៖ លោក ពូទីន ប្រធានាធិបតីរុស្ស៊ី, លោក ស៊ី ជីងពីង ប្រធានាធិបតីចិន, លោក Recep Tayyip Erdogan ប្រធានាធិបតីតួកគី និងលោក Jair Bolsonaro ប្រធានាធិបតីប្រេស៊ីល។ 

មេដឹកនាំប្រទេស បារាំង កាណាដា និងអង់គ្លេស បានចេញសារតាមបណ្តាញសង្គមអបអរលោក ចូ បៃដិន រួចហើយ។ នៅអាស៊ាន គឺមានលោក លី សៀនឡុង នាយករដ្ឋមន្ត្រីសឹង្ហបុរី ក៏បានចេញសារអបអរលោក ចូ បៃដិន ផងដែរ៕