(ភ្នំពេញ)៖ ថ្ងៃទី៧ ខែវិច្ឆិកានេះ គឺជាខួបទី១៧ ឆ្នាំហើយ ដែលកម្ពុជាបានចុះបញ្ជី “របាំព្រះរាជទ្រព្យ” គឺជាសម្បត្តិបេតិកភណ្ឌដ៏មានតម្លៃមិនអាចកាត់ថ្លៃបានរបស់ព្រះរាជាណាចក្រកម្ពុជាតែមួយគត់ ដែលបានថែរក្សានាដកម្មបុរាណមួយនេះ អស់រយៈពេលដ៏យូរលង់ណាស់មកហើយ។
សម្តេចតេជោ ហ៊ុន សែន បានលើកឡើងក្នុងសារលើហ្វេសប៊ុកនាព្រឹកថ្ងៃទី៧ ខែវិច្ឆិកា ឆ្នាំ២០២០ ថា “របាំព្រះរាជទ្រព្យ” ត្រូវបានចុះក្នុងបញ្ជីជាសម្បត្តិបេតិកភណ្ឌវប្បធម៌អរូបីនៃមនុស្សជាតិ នៅថ្ងៃទី ០៧ ខែ វិច្ឆិកា ឆ្នាំ ២០០៣ ។ របាំក្បាច់ខ្មែរបុរាណ ឬ របាំព្រះរាជទ្រព្យនេះ មានភាពល្បីល្បាញខាងមានកាយវិកាទន់ភ្លន់ គួរឱ្យចង់គយគន់ និង មានទ្រង់គ្រឿងចាំងភ្លឺផ្លេកៗ។ របាំព្រះរាជទ្រព្យ របាំក្បាច់បុរាណខ្មែរ ជាប្រភេទរបាំ ដែលនាដករ ប្រើចលនាកាយវិកា ក្បាច់ និង មនោសញ្ចោតនា យ៉ាងប៉ិនប្រសប់ទៅតាមការវិវត្តនៃសាច់រឿង ដែលរៀបរាប់បញ្ជាក់ដោយទំនុកច្រៀង នៃក្រុមចម្រៀង ជាពួក (ជហៀរាលេ) ដែលមាន តួនាទីច្រៀងជូនរបាំនេះ ជាមួយនឹងវង់ភ្លេងពិណពាទ្យ ដែលមានតួនាទីប្រគំជូនរបាំនេះផងដែរ។
សូមរម្លឹកថា ចាប់តាំងពីឆ្នាំ១៩៩២ មកដល់ឆ្នាំ២០១៨ កម្ពុជា មានសម្បត្តិបេតិកភណ្ឌ ចំនួន ៨ ត្រូវបានចុះក្នុងបញ្ជីបេតិកភណ្ឌពិភពលោក របស់អង្គការយូណេស្កូ រួមមាន៖
១. ប្រាសាទអង្គរវត្ត ត្រូវបានចុះនៅក្នុងបេតិកភណ្ឌពិភពលោក នៅថ្ងៃទី១៤ ខែធ្នូ ឆ្នាំ១៩៩២។
២. របាំព្រះរាជទ្រព្យ ត្រូវបានចុះជាសមុ្បតិ្តបេតិកភណ្ឌពិភពលោក នាថ្ងៃទី៧ ខែវិច្ឆិកា ឆ្នាំ២០០៣។
៣. ល្ខោនស្បែកធំ ត្រូវបានចុះជាសម្បត្តិបេតិកភណ្ឌពិភពលោកនាថ្ងៃទី២៥ ខែវិច្ឆិកា ឆ្នាំ២០០៥។
៤. ប្រាសាទព្រះវិហារ ត្រូវបានចុះបញ្ជីជាសម្បត្តិបេតិកភណ្ឌពិភពលោក នាថ្ងៃទី០៧ ខែកក្កដា ឆ្នាំ២០០៨។
៥. ល្បែងទាញព្រ័ត្រ ត្ឬូវបានចុះបញ្ជីក្នុងបញ្ជីបេតិកភណ្ឌពិភពលោក នៅថ្ងៃទី២ ខែធ្នូ ឆ្នាំ២០១៥
៦. ចាប៉ីដងវែង បានចុះជាសម្បត្តិបេតិកភណ្ឌពិភពលោក នាថ្ងៃទី៣០ ខែវិច្ឆិកា ឆ្នាំ២០១៦។
៧. ប្រាសាទសំបូរព្រៃគុក ចុះក្នុងបញ្ជីបេតិកភណ្ឌពិភពលោក នៅថ្ងៃទី៨ ខែកក្កដា ឆ្នាំ២០១៧។
៨. ល្ខោនខោលវត្តស្វាយអណ្តែត ចុះក្នុងបញ្ជីបេតិកភណ្ឌពិភពលោក នាថ្ងៃទី២៨ ខែវិច្ឆិកា ឆ្នាំ២០១៨៕
