(ភ្នំពេញ)៖ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានក្រាបបង្គំតាងនាមថ្នាក់ដឹកនាំ មន្រ្តីរាជការស៊ីវិល និងនគរបាលជាតិនៃក្រសួងមហាផ្ទៃ សូមរាជានុញ្ញាតសម្ដែងនូវគារវកិច្ច និងអំណរសាទរ ក្នុងឱកាសសម្ដេចព្រះមហាក្សត្រី ព្រះវររាជមាតាជាតិខ្មែរ ត្រូវបានរដ្ឋាភិបាលនៃសាធារណរដ្ឋប្រជាមានិតចិន ថ្វាយគ្រឿងឥស្សរិយយស«មិត្តភាពនៃសាធារណរដ្ឋប្រជាមានិតចិន» ដែលជាគ្រឿងឥស្សរិយយសដ៏ខ្ពង់ខ្ពស់បំផុតសម្រាប់ថ្នាក់ដឹកនាំបរទេស។

ការថ្វាយនូវគ្រឿងឥស្សរិយយសដ៏ឧត្ដុងឧត្តមនេះ គឺជាមោទកភាព និងជាសក្ខីភាពប្រវត្តិសាស្ត្រនៃព្រះរាជបូជនីយកិច្ច និងព្រះរាជគុណូបការៈដ៏ធំធេង របស់សម្ដេចព្រះមហាក្សត្រី ព្រះវររាជមាតាជាតិខ្មែរ ដែលព្រះអង្គបានលះបង់កម្លាំងព្រះកាយពល និងព្រះបញ្ញាញាណ បំពេញព្រះរាជតួនាទី និងដង្ហែយ៉ាងស្មោះស្ម័គ្រនៅគ្រប់កាលៈទេសៈជាមួយព្រះករុណា ព្រះបរមរតនកោដ្ឋ ដែលជាស្ថាបនិកផ្ដួចផ្ដើមកសាង និងបន្តលើកស្ទួយទំនាក់ទំនងមិត្តភាពរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន អស់រយៈពេលជាង៧០ឆ្នាំកន្លងមកនេះ។

ទូលព្រះបង្គំយើងខ្ញុំចងចាំជានិច្ចនូវស្នាព្រះហស្ត និងព្រះមហាករុណាទិគុណ ប្រកបដោយគុណតម្លៃមិនអាចកាត់ថ្លៃបាននេះ ព្រមទាំងព្រះរាជសមិទ្ធផលជាច្រើន ដែលបានប្រសូត្រចេញពីកេរ្តិ៍ដំណែលដ៏ថ្លៃថ្លានៃចំណងមិត្តភាពរវាងប្រជាជននៃប្រជាជាតិទាំងពីរ កម្ពុជា-ចិន ក្រោមវីរភាពដ៏ក្លៀវក្លា និងមគ្គុទេសន៍ដ៏ឈ្លាសវៃរបស់ព្រះករុណា ព្រះបរមរតនកោដ្ឋ និងសម្ដេចព្រះមហាក្សត្រី ព្រះវររាជមាតាជាតិខ្មែរ៕