(ភ្នំពេញ)៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរចរណ៍ផ្លូវគោក បានចេញលិខិត អំពាវនាវ ១០ ចំណុច ដើម្បីបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោក ក្នុងឱកាសព្រះរាជពិធីបុណ្យអុំទូក ចាប់ពីថ្ងៃទី៣០-៣១ ខែតុលា និងថ្ងៃទី១ ខែវិច្ឆិកា ឆ្នាំ២០២០។
សេចក្តីអំពាវនាវ ទាំង ១០ ចំណុចនោះ រួមមាន៖
១-មិនត្រូវបើកបរលើសល្បឿនកំណត់ជាដាច់ខាត
២-មិនត្រូវបើកបរក្រោមឥទ្ធិពលនៃគ្រឿងស្រវឹងជាដាច់ខាត
៣-មិនត្រូវបត់ ឬវ៉ាជែងក្នុងភាពប្រថុយប្រថាន ឬប្រើទូរស័ព្ទដោយគ្មានឧបករណ៍សំឡេងភ្ជាប់ទំនាក់ទំនង
៤-មិនត្រូវផ្ទុកអ្នកដំណើរ ឬទំនិញលើសច្បាប់កំណត់។ ចំពោះរថយន្តដឹកអ្នកដំណើរ ឬដឹកកម្មករ មិនត្រូវផ្ទុកអ្នកដំណើរ ឬកម្មករលើដំបូល និងសូមមេត្តា កុំដំឡើងថ្លៃធ្វើដំណើរក្នុងឱកាសនេះ។
៥-មិនត្រូវបើកបរក្នុងស្ថានភាពងងុយដេកជាដាច់ខាត
៦-ត្រូវពាក់មួកសុវត្ថិភាពជានិច្ច ក្នុងពេលធ្វើដំណើរតាមទោចក្រយានយន្ត
៧-ត្រូវគោរពសិទ្ធិអាទិភាព គោរពសញ្ញាចរាចរណ៍ និងប្រកាន់ស្តាំជានិច្ច
៨-ត្រូវពាក់ខ្សែក្រវាត់សុវត្ថិភាពជានិច្ច ក្នុងពេលធ្វើដំណើរតាមរថយន្ត
៩-ត្រូវត្រួតពិនិត្យលក្ខណៈបច្ចេកទេសយានយន្តជានិច្ច ពិសេសត្រួតពិនិត្យកង់ ចង្កូត ហ្វ្រាំង ភ្លើងបំភ្លឺ។ល។
១០-ត្រូវបើកបរក្នុងស្មារតីប្រុងប្រយ័ត្នជានិច្ច ប្រកបដោយសីលធម៌យោគយល់អធ្យាស្រ័យ។
សូមរម្លឹកថា ព្រះរាជពិធីបុណ្យអុំទូក នៅឆ្នាំនេះ មិនមានរៀបចំពិធីជួបជុំ អុំទូក ដូចរៀងរាល់ឆ្នាំ នៅមុខព្រះបរមរាជវាំង ក្នុងរាជធានីភ្នំពេញឡើយ។ មូលហេតុ ដើម្បីទប់ស្កាត់ និងការពារ កុំឲ្យឆ្លងរាលដាលជំងឺកូវីដ១៩។
ក៏ប៉ុន្តែការឈប់សម្រាក ត្រូវបានរាជរដ្ឋាភិបាល សម្រេចឲ្យមន្ត្រីរាជការ កម្មករនិយោជិត ឈប់សម្រាក ៤ថ្ងៃ ក្នុងអំឡុងពេលបុណ្យអុំទូក ចាប់ពីថ្ងៃទី៣០-៣១ ខែតុលា ព្រមទាំងថ្ងៃទី១ និងថ្ងៃទី២ ខែវិច្ឆិកា ឆ្នាំ២០២០។ ដោយសារតែថ្ងៃទី១ ខែវិច្ឆិកា ត្រូវនឹងថ្ងៃអាទិត្យ ទើបត្រូវលើកពេលឈប់សម្រាក ១ថ្ងៃជំនួសវិញ នៅថ្ងៃទី២វិច្ឆិកា។
ក្នុងនោះ នៅថ្ងៃទី២៩ ខែតុលា ឆ្នាំ២០២០ ក៏ជាថ្ងៃបុណ្យជាតិ នៃខួប ១៦ឆ្នាំ នៃការគ្រងព្រះបរមរាជសម្បត្តិរបស់ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី។
ដូច្នេះនៅចុងសប្តាហ៍នេះ នឹងមានការឈប់សម្រាករយៈពេល ៥ថ្ងៃជាប់ៗគ្នា ដែលនាំឲ្យការធ្វើដំណើរមមាញឹកជាងមុន ហើយគ្រោះថ្នាក់ចរាចរណ៍ ក៏អាចកើតឡើងដោយយថាហេតុ បើសិនជាអ្នកបើកបរ ធ្វេសប្រហែស។
សូមរម្លឹកថា អំឡុងពេលព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ រយៈពេល ៣ថ្ងៃ កាលពីថ្ងៃទី១០-១២ ខែវិច្ឆិកា ឆ្នាំ២០១៩ នៅទូទាំងប្រទេស កើតមានគ្រោះថ្នាក់ ៣៦ករណី បណ្តាលឲ្យស្លាប់ ១០នាក់ និងរបួស ៧៧នាក់។
ដោយឡែក ក្នុងព្រះរាជពិធីបុណ្យអុំទូក រយៈពេល ៣ថ្ងៃ ចាប់ពីថ្ងៃទី២១-២៣ ខែវិច្ឆិកា ឆ្នាំ២០១៨ គ្រោះថ្នាក់ចរាចរណ៍ផ្លូវគោក នៅទូទាំងប្រទេស បានកើតឡើង ចំនួន ៣៨ លើក បណ្តាលឲ្យស្លាប់ ១៦នាក់ និងរបួសសរុប ៦០នាក់។
ក្នុងរយៈពេល ៣ថ្ងៃ នៃព្រះរាជពិធីបុណ្យអុំទូក កាលពីឆ្នាំ២០១៧ ចាប់ពីថ្ងៃទី០២-០៤ ខែវិច្ឆិកា ឆ្នាំ២០១៧ គ្រោះថ្នាក់ចរាចរណ៍ផ្លូវគោក នៅទូទាំងប្រទេស បានកើតឡើង ៣៩ លើក បណ្តាលឲ្យស្លាប់ ២៥នាក់ និងរងបួស ៤៥នាក់៕
