(ភ្នំពេញ)៖ បុរសជនជាតិបារាំងម្នាក់ ដែលទើបរកឃើញឆ្លងជំងឺកូវីដ១៩ ពេលមកដល់កម្ពុជា កាលពីថ្ងៃទី២៣ ខែតុលា ឆ្នាំ២០២០ បានតវ៉ានឹងលទ្ធផលតេស្តរកមេរោគកូវីដ១៩ របស់វិទ្យាស្ថានប៉ាស្ទ័រ។ នេះបើតាមសម្តេចតេជោ នាយករដ្ឋមន្ត្រី ហ៊ុន សែន។
សម្តេចតេជោ ហ៊ុន សែន បានប្រកាសដូច្នេះ ក្នុងពេលអញ្ជើញសួរសុខទុក្ខ និងចែកអំណោយដល់ពលរដ្ឋរងគ្រោះ ដោយជំនន់ទឹកភ្លៀង នៅក្នុងខេត្តបន្ទាយមានជ័យ នាព្រឹកថ្ងៃទី២៤ ខែតុលា ឆ្នាំ២០២០។
យ៉ាងណាក៏ដោយ សម្តេចតេជោ ហ៊ុន សែន បានបញ្ជាក់ថា បុរសជនជាតិបារាំងនោះ តវ៉ាថា បារាំងបានបញ្ជាក់ថា គាត់មិនមានវីរុសកូវីដ១៩ទេ។ តែយើងប្រាប់គាត់ថា ពេលអ្នកមកដល់កម្ពុជា យើងរកឃើញមេរោគកូវីដ១៩។ ដូច្នេះ ទោះជាគាត់តវ៉ាយ៉ាងណាក៏ដោយ ក៏យើងត្រូវយកគាត់ ទៅដាក់នៅមន្ទីរពេទ្យដែរ ដើម្បីកុំឲ្យមានការឆ្លងរាលដាលបន្ត។ កាលពីលើកមុន ក៏មានបុរសជនជាតិអង់គ្លេស បានតវ៉ាដូច្នេះដែរ។
ក្រសួងសុខាភិបាលបានប្រកាសនៅព្រឹកថ្ងៃទី២៤ ខែតុលា ឆ្នាំ២០២០ ថា បុរសជនជាតិបារាំង អាយុ ៣៧ឆ្នាំ មានអាសយដ្ឋានស្នាក់នៅរាជធានីភ្នំពេញ បានធ្វើដំណើរមកពីប្រទេសបារាំង បន្តជើងហោះហើរ នៅប្រទេសចិន ( តៃវ៉ាន់ ) បានមកដល់កម្ពុជា នៅថ្ងៃទី១១ ខែតុលា ឆ្នាំ២០២០។ លទ្ធផលធ្វើតេស្តវត្ថុសំណាកលើកទី២ នៅថ្ងៃទី១៣ នៃការធ្វើចត្តាឡីស័ករបស់បុគ្គលនេះ គឺមានវីរុស កូវីដ១៩ ដែលផ្តល់ដោយវិទ្យាស្ថានប៉ាស្ទ័រកម្ពុជា ក្នុងរាជធានីភ្នំពេញ។ បច្ចុប្បន្ន អ្នកជំងឺ ត្រូវបានដាក់ឲ្យសម្រាកព្យាបាល នៅមន្ទីរពេទ្យមិត្តភាពខ្មែរ-សូវៀត។
ក្រសួងសុខាភិបាល បានកត់សម្គាល់ថា អ្នកដំណើរតាមយន្តហោះ ជាមួយអ្នកជំងឺជនជាតិបារាំងនេះ សរុបមានចំនួន ៨៥នាក់ ( ស្រី ២៦នាក់ កុមារ ៣នាក់ និងទារក ៣នាក់ )។
នៅថ្ងៃទី២៤ ខែតុលានេះ ក្រសួងសុខាភិបាល ក៏បានប្រកាសថា មានអ្នកជាសះស្បើយពីជំងឺកូវីដ១៩ ចំនួន ៣នាក់ រួមមាន បុរសជនជាតិឥណ្ឌូនេស៊ី ម្នាក់ បុរសជនជាតិខ្មែរម្នាក់ និងស្ត្រីជនជាតិបារាំងម្នាក់។
ក្រសួងសុខាភិបាល បានប្រកាសថា គិតមកដល់ម៉ោង ៧ ព្រឹកថ្ងៃទី២៤ ខែតុលា ឆ្នាំ២០២០ នៅទូទាំងប្រទេសកម្ពុជា រកឃើញអ្នកឆ្លងជំងឺកូវីដ១៩ សរុបចំនួន ២៨៧នាក់ ( ស្ត្រី ៥៨នាក់ និងបុរស ២២៩នាក់ )។ ក្នុងនោះ ២៨៣នាក់ ត្រូវបានព្យាបាលជាសះស្បើយ និង ៤នាក់ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ ( បុរសជនជាតិខ្មែរ ២នាក់ ស្ត្រីជនជាតិខ្មែរ ម្នាក់ និងបុរសជនជាតិបារាំង ម្នាក់ )៕
