(ភ្នំពេញ)៖ សម្តេចតេជោ នាយករដ្ឋមន្ត្រី ហ៊ុន សែន បានប្រកាសក្នុងសម័យប្រជុំគណៈរដ្ឋមន្ត្រី នាព្រឹកថ្ងៃទី២៣ ខែតុលា ឆ្នាំ២០២០ ថា «ខ្ញុំមិនដែលនិយាយជាមួយចិន ឬជាមួយប្រទេសណាមួយ ស្តីពី បម្រើបម្រាស់កំពង់ផែ វាលយន្តហោះកម្ពុជាសម្រាប់យោធាបរទេសទេ ហើយរដ្ឋធម្មនុញ្ញ ក៏មិនអនុញ្ញាតឲ្យដែរ»។
ប្រសាសន៍របស់សម្តេចតេជោ នាយករដ្ឋមន្ត្រី ខាងលើនេះ ត្រូវបានឯកឧត្តម ខៀវ កាញារីទ្ធិ រដ្ឋមន្ត្រីក្រសួងព័ត៌មាន បានស្រង់មកផ្សព្វផ្សាយ លើហ្វេសប៊ុកផ្លូវការរបស់ឯកឧត្តម នាថ្ងៃទី២៣ ខែតុលានេះ។
ការបញ្ជាក់ជាថ្មីរបស់សម្តេចតេជោ ហ៊ុន សែន ដូច្នេះ ខណៈដែលប្រទេសមហាអំណាចមួយចំនួន តែងតែចោទប្រកាន់កម្ពុជា មិនចេះចប់មិនចេះហើយ ថាកម្ពុជា ប្រគល់ឲ្យចិន ប្រើប្រាស់កំពង់ផែ និងព្រលានយន្តហោះ សម្រាប់សកម្មភាពយោធា។
ក៏ប៉ុន្តែម្តងជាពីរម្តង ហើយជាពិសេសកាលពីថ្ងៃទី០៧ ខែតុលា ឆ្នាំ២០២០ នៅក្នុងពិធីសម្ពោធមជ្ឈមណ្ឌលកម្សាន្តខ្នាតយក្ស នៅកម្ពុជា «ព្រីនស៍ ម៉ាណ័រ» នៅស្រុកកៀនស្វាយ ខេត្តកណ្តាល សម្តេចតេជោ ហ៊ុន សែន បានប្រកាសថា កំពង់ផែរាម ជាកំពង់ផែយោធាផ្តាច់មុខរបស់កម្ពុជា ដែលមិនមែនជាកំពង់ផែអន្តរជាតិ សម្រាប់ដឹកទំនិញចេញចូលនោះទេ។ ប៉ុន្តែប្រសិនបើប្រទេសណាមួយ ចង់ចូលចត នៅកំពង់ផែយោធានេះ គឺត្រូវស្នើសុំការអនុញ្ញាតពីកម្ពុជា ជាមុនសិន ហើយអាចចូលចតនាវាយោធា នៅកំពង់ផែយោធាកម្ពុជា ដូចជា ចូលចតចាក់ប្រេង ឬឡើងគោក ដើម្បីសមយុទ្ធជាមួយនឹងកម្ពុជា ឬធ្វើកិច្ចការអ្វីមួយ ជាមួយនឹងកម្ពុជា។ សម្តេចបានប្រកាសស្វាគមន៍គ្រប់ប្រទេសទាំងអស់ មិនមែនតែមិត្តចិនមួយប៉ុណ្ណោះ៕
