(បន្ទាយមានជ័យ)៖ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសស្វាគមន៍សប្បុរសជន និងគណបក្សនយោបាយនានា ចូលរួមចែកអំណោយសង្គ្រោះប្រជាពលរដ្ឋដោយគ្រោះទឹកជំនន់។ 

សម្ដេចតេជោ ហ៊ុន សែន មានប្រសាសន៍ថា៖ «សូមបញ្ជាក់ហើយបញ្ជាក់ទៀត មិនមែនបានសេចក្តីថា ពេលដែលខ្ញុំចែកចប់ហើយមានសប្បុរសជនមកចែកយើងមិនអោយចែក អត់ទេ អ្នកណាយកមកចែកកាន់តែច្រើនកាន់តែល្អ សប្បុរសជននានា គណបក្សនយោបាយនានា អញ្ជើញមក ហើយសង្ឃឹមថា គណបក្សនយោបាយ អ្នកនយោបាយ សុំកុំឲ្យមានការរើសអើង អ្នកណាក៏ដោយយើងត្រូវការសង្គ្រោះប្រជាពលរដ្ឋជាសំខាន់»។ 

ការថ្លែងរបស់សម្តេចតេជោ ហ៊ុន សែន ក្នុងឱកាសសម្ដេចតេជោ អញ្ជើញចុះជួបសួរសុខទុក្ខ និងចែកអំណោយជូនប្រជាពលរដ្ឋ១ម៉ឺនគ្រួសារ ដែលរងគ្រោះដោយសារទឹកជំនន់ នៅស្រុកមង្គលបុរី ខេត្តបន្ទាយមានជ័យព្រឹកថ្ងៃទី២១ ខែតុលា ឆ្នាំ២០២០ ខណៈដែលថ្ងៃទី២២ ខែតុលា នឹងបន្តចែកអំណោយដល់ប្រជាពលរដ្ឋ១ម៉ឺ នគ្រួសារទៀត។

សូមជម្រាបថា ពិធីចែកអំណោយរបស់សម្ដេចតេជោ ហ៊ុន សែន នឹងត្រូវធ្វើឡើងពីរគោលដៅថ្ងៃទី២១ និង ២២ ខែតុលា ឆ្នាំ២០២០៖

- គោលដៅទី១៖ បរិវេណចំណុចទីទួលសុវត្ថិភាព (ផ្លូវជាតិលេខ៥-ផ្លូវវៀង) ភូមិបត់ត្រង់ ឃុំបត់ត្រង់ ស្រុកមង្គលបូរី។

- គោលដៅទី២៖ ផ្សារធំថ្មី បូរីជ័យII ចំការតាដោក ភូមិចំការតាដោក ឃុំឫស្សីក្រោក ស្រុកមង្គលបុរី ។

បន្ទាប់ពីបំពេញបេសកកម្មនៅខេត្តបន្ទាយមានជ័យ រយៈពេល២ថ្ងៃរួចហើយនឹងត្រឡប់មកចូលរួមដឹកនាំកិច្ចប្រជុំគណៈរដ្ឋមន្ត្រីវិញនៅថ្ងៃទី២៣ ខែតុលា ឆ្នាំ២០២០៕