(ភ្នំពេញ)៖ ក្រសួងធនធានទឹក និងឧតុនិយម បានប្រកាសថា គិតមកដល់ព្រឹកថ្ងៃទី១២ ខែតុលា ឆ្នាំ២០២០ ស្ថានភាពទឹកតាមដងស្ទឹងព្រែកត្នោត មានដូចខាងក្រោម៖ ១-កម្ពស់ទឹក គឺនៅលើសំណង់បង្ហៀរកម្ពស់ទឹក ៥,៦៣ហូរលើបង្ហៀរ០,៨៣ម៉ែត្រ កើនជាងម្សិលមិញ ០,២២ម៉ែត្រ -ផ្នែកខាងក្រោយ សំណង់៨,៣៥ម៉ែត្រ ធៀបពីម្សិលមិញ កើន ០,២៥ម៉ែត្រ និងនៅតាមដងស្ទឹង វត្តក្តុល ទឹកកើន ០,៣ម៉ែត្រ។
ជាមួយគ្នានេះ ក្រសួងធនធានទឹក និងឧតុនិយម បានប្រកាសពីសកម្មភាពការងាររបស់មន្ត្រីជំនាញ គឺចុះតាមដានសភាពទឹកតាមដងស្ទឹង ដឹកដីចាក់ត្រង់ចំណុចដែលមានរូងនាគ ទីតាំងគ្រឿងចក្រឈជើង ៤ទីតាំង និងរៀបបាវខ្សាច់ នៅជិតវត្តចំការខ្សាច់បន្ត។
ជាមួយគ្នានេះ ក្រសួងធនធានទឹក និងឧតុនិយម បានប្រកាសថា ល្ងាចនេះ ទឹកអាចងើបឡើងបន្តិច ដោយសារទ្វារទឹក នៅរលាំងជ្រៃបើកបន្ថែម។
សូមរម្លឹកថា កាលពីយប់មិញ ក្រសួងធនធានទឹក និងឧតុនិយម បានប្រកាសថា ស្ថានភាពទឹកស្ទឹងព្រែកត្នោត នៅបន្តឡើងបន្ថែមទៀត តែមិនទាន់មានអ្វី ដែលជាការយាយីដល់រាជធានីភ្នំពេញនៅឡើយទេ។
ក្នុងនោះ កាលពីវេលាម៉ោង ២០:០០នាទី យប់ថ្ងៃអាទិត្យ ទី១១ ខែតុលា ឆ្នាំ២០២០ ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានបន្តដឹកនាំក្រុមការងារបច្ចេកទេសក្រសួង ចុះពិនិត្យស្ថានភាពទឹកលើខ្នងទំនប់សណ្តស្ទឹងព្រែកត្នោត នៅទីតាំងវត្តចំការខ្សាច់ សង្កាត់ស្ពានថ្ម ខណ្ឌដង្កោ រាជធានីភ្នំពេញ ដែលកំពុងយាយីដោយជំនន់ស្ទឹងព្រែកត្នោត នៅភូមិសាស្ត្រភាគខាងលិចរាជធានីភ្នំពេញ និងខេត្តកណ្តាល។
ក្នុងដំណើរបេសកកម្មចុះពិនិត្យស្ថានភាពទឹកជាក់ស្តែង ទាំងយប់នេះ ឯកឧត្ដមរដ្ឋមន្ត្រី បានណែនាំបន្ថែមដល់ក្រុមការងារបច្ចេកទេស ឲ្យយកបាវខ្សាច់ មករៀបលើខ្នងទំនប់កម្ពស់ ០,៥០ ម៉ែត្រ ដើម្បីលើកកម្ពស់ខ្នងទំនប់បន្ថែមបង្ការលំហូរទឹកពីលើខ្នងទំនប់ ដែលអាចបង្កឲ្យមានលិចលង់ដល់ភូមិឋានប្រជាពលរដ្ឋនៅប៉ែកខាងក្រោម។
ក្រសួងធនធានទឹក និងឧតុនិយម បានប្រកាសថា ស្ថានភាពទឹកនៅបន្តឡើងបន្ថែមទៀត តែមិនទាន់មានអ្វីដែលជាការយាយីដល់រាជធានីភ្នំពេញនៅឡើយទេ ដោយក្រុមការងារបច្ចេកទេសរបស់ក្រសួង បានបិតរូងនាគជាច្រើនកន្លែងនៅតាមតួទំនប់ និងយាមប្រចាំការ ២៤ម៉ោង លើ២៤ម៉ោង អស់រយៈពេលជាង ១សប្តាហ៍មកហើយ។
ជាសំណូមពររបស់ឯកឧត្តមរដ្ឋមន្ត្រីក្រសួងធនធានទឹក និងឧតុនិយម ដល់ស្ថាប័ន ដែលកំពុងធ្វើការដ្ឋាន ក៏ដូចជាបណ្តាក្រុមហ៊ុនឯកជន និងបងប្អូនប្រជាពលរដ្ឋយើង មេត្តារក្សានូវទំហំ ឬច្រកមុខទឹកចាស់ ដើម្បីធានាដល់ការដោះទឹកឲ្យមានប្រសិទ្ធភាពទាន់ពេលវេលា បើពុំនោះទេ រាជធានីភ្នំពេញនឹងទទួលរងការគំរាមកំហែងយ៉ាងធ្ងន់ធ្ងរ៕
