(ភ្នំពេញ)៖ ក្រសួងធនធានទឹក និងឧតុនិយម បានប្រកាសនៅរសៀលថ្ងៃទី១០ ខែតុលា ឆ្នាំ២០២០ ថា នៅខេត្តប៉ៃលិន ផលប៉ះពាល់ និងការខូចខាតដោយសារជំនន់ទឹកភ្លៀង គិតត្រឹមព្រឹកថ្ងៃទី១០ ខែតុលា ឆ្នាំ២០២០ មានដូចខាងក្រោម៖
១.ក្រុងប៉ៃលិន
- ទឹកជន់ចូលផ្ទះចំនួន ៥៤ខ្នង (ទឹកស្រកវិញអស់ហើយ) ប៉ះពាល់ដល់ហេដ្ឋារចនាសម្ព័ន្ធមួយចំនួន
២.ស្រុកសាលាក្រៅ
- ទឹកជន់លិចផ្ទះបងប្អូនប្រជាពលរដ្ឋ ចំនួន ៣៩៨ខ្នង សាលារៀន ០១កន្លែង វត្តចំនួន ០២កន្លែង (ស្រកវិញ ៣៥ខ្នងផ្ទះ ក្រៅពីនោះ ទឹកកំពុងបន្តឡើង និងកំពុងបន្តជន់ចូលចំណុចផ្សេងទៀត)។
- ទូទាំងស្រុកសាលាក្រៅ ទឹកកំពុងហូរកាត់លើខ្នងទំនប់ ០១ខ្សែប្រវែង២៥០ម ខ្នងប្រឡាយ ០៦ខ្សែ ប្រវែង១២០០ម ទ្វារទឹកចំនួន ០៥កន្លែង និងហេដ្ឋារចនាសម្ព័ន្ធផ្សេងៗទៀត ព្រមទាំងដីកសិកម្មមួយចំនួនផងដែរ។
ក្រសួងធនធានទឹក និងឧតុនិយម បានប្រកាសថា ប្រសិនបើពុំមានភ្លៀងធ្លាក់បន្តទៀតទេ នោះឃុំសាលាក្រៅ និងឃុំស្ទឹងត្រង់ ស្រុកសាលាក្រៅ ទឹកនិងចាប់ផ្តើមស្រកចុះបណ្តើរៗវិញ នៅយប់នេះ។ ចំពោះឃុំ/សង្កាត់ផ្សេងៗទៀត ទឹកបានស្រកចុះជិតអស់ហើយ៕
