(ភ្នំពេញ)៖ នៅរសៀលថ្ងៃទី៩ ខែតុលា ឆ្នាំ២០២០នេះ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងថ្នាក់ដឹកនាំក្រុមប្រឹក្សាជាតិភាសាខ្មែរ បាននិមន្តព្រះតេជគុណ ហាក់ សៀងហៃ ដែលទើបនឹងត្រូវបានប្រគេនតួនាទីជាទីប្រឹក្សានៃក្រុមប្រឹក្សាជាតិភាសាខ្មែរ នៃរាជបណ្ឌិត្យសភាកម្ពុជា តាមរយៈសេចក្ដីសម្រេចលេខ: ០៤២/២០ ស.ស.រ.។ 

ឯកឧត្តមបណ្ឌិតសភាចារ្យ សុខ ទូច បានឲ្យដឹងថា ថ្នាក់ដឹកនាំនៃក្រុមប្រឹក្សាជាតិភាសាខ្មែរ បានទូលព្រះតេជគុណអំពីតួនាទីដ៏មានតម្លៃរបស់ព្រះអង្គដែលបានតួនាទីផ្សព្វផ្សាយអក្សរសាស្ត្រខ្មែរ និងបានទូលសុំព្រះតេជគុណដើរតួនាទីផ្សព្វផ្សាយនូវពាក្យថ្មីៗ មាននៅក្នុងសទ្ទានុក្រមបច្ចេកសព្ទថ្មីទាំង១១ក្បាល ដែលជាសទ្ទានុក្រមទាំង១១ជំនាញ ដែលក្រុមប្រឹក្សាជាតិភាសាខ្មែរបានអនុម័តរួច និងជាពាក្យបច្ចេកទេសបង្កើតថ្មី ពុំមាននៅក្នុងវចនានុក្រមសម្ដេចព្រះសង្ឃរាជ ជួត ណាត នៅឡើយ៕