(ភ្នំពេញ)៖ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានប្រាប់ដល់ប្រជាពលរដ្ឋដែលមានបំណងចង់ធ្វើ ប្រហុក ផ្អក ត្រីឆ្អើ ជាដើម សម្រាប់ទុកបរិភោគប្រចាំឆ្នាំ អាចទៅទិញត្រីក្នុងខែបុស្សនេះឱ្យបានរួសរាន់ តាមពេលវេលា និងទីកន្លែងមួយចំនួន។ 

សេចក្តីប្រកាសព័ត៌មានរបស់រដ្ឋបាលជលផល បានបញ្ជាក់ថា ក្នុងរដូវនេសាទឆ្នាំ២០២០-២០២១នេះ បន្ទាប់ពីបានធ្វើការសង្កេតតាមដានលើកំពស់ ទឹកដែលហូរចេញពីបឹងទន្លេសាបរួចមកឃើញថា គន្លងដាយនៅតាមដងទន្លេសាប ក្នុងភូមិសាស្ត្ររាជធានីភ្នំពេញ និង ខេត្តកណ្តាល អាចនេសាទត្រីបានច្រើននៅក្នុងខែបុស្សនេះ គឺចាប់ពីថ្ងៃ ថ្ងៃទី២០ រហូតដល់ថ្ងៃទី២៦ ខែធ្នូ ឆ្នាំ២០២០ ប្រសិនបើផ្ទៃមេឃស្រឡះល្អ មិនមានភ្លៀងកក់ខែ ឬទទួលរងឥទ្ធិពលព្យុះ។

ជាមួយគ្នានោះដែរ រដ្ឋបាលជលផលក៏បានសំណូមពរដល់អាជ្ញាធរមូលដ្ឋាន សមត្ថកិច្ចគ្រប់ជាន់ថ្នាក់ឱ្យបង្កលក្ខណៈងាយស្រួលជូនដល់ប្រជាពលរដ្ឋបានធ្វើដំណើរទៅមកស្នាក់នៅ និងដឹកជញ្ជូនផលិតផលត្រី កុំឱ្យមានការរាំងស្ទះតាមការគួរ៕