(ភ្នំពេញ)៖ ឯកអគ្គរដ្ឋទូតអាមេរិកប្រចាំកម្ពុជា នៅថ្ងៃទី១៥ ខែធ្នូ ឆ្នាំ២០២០នេះ បានជួបជាមួយ​តំណាង​គណ​បក្ស​​នយោបាយមួយចំនួន ដោយបានពិភាក្សាអំពីបញ្ហាប្រជាធិបតេយ្យពហុបក្សនៅកម្ពុជា។

នៅក្នុងរូបភាពមួយសន្លឹក ដែលបង្ហោះជាសាធារណៈក្នុងទំព័រហ្វេសប៊ុកផ្លូវការ របស់ស្ថានទូតសហរដ្ឋអា​មេរិក​ប្រចាំ​កម្ពុជា​ បានបង្ហាញថា លោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជា បានជួបជាមួយលោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ, លោក មុត ចន្ថា អតីតមន្ត្រីនៃអតីតគណបក្ស​សង្រ្គោះ​ជាតិ, លោក យ៉េង វីរៈ ប្រធានគណបក្សប្រជាធិបតេយ្យមូលដ្ឋាន, លោក សុខសុវណ្ណ វឌ្ឍនាសាប៊ុង ប្រធានគណ​បក្សខ្មែរក្រោក, និងតំណាងគណបក្សនយោបាយមួយចំនួនទៀត។

ទំព័រហ្វេសប៊ុករបស់ស្ថានទូតសហរដ្ឋអាមេរិកប្រចាំកម្ពុជា បានសរសេរថា «លោកឯកអគ្គរដ្ឋទូតអាមេរិក លោក W. Patrick Murphy នៅថ្ងៃនេះ បានជួបជាមួយតំណាងគណបក្សនយោបាយមួយចំនួន នៅប្រទេសកម្ពុជា ដើម្បីពិភាក្សាពីប្រជាធិបតេយ្យពហុបក្ស នៅក្នុងព្រះរាជាណាចក្រនេះ។ សហរដ្ឋអាមេរិក គាំទ្រប្រជាជនកម្ពុជា និង សិទ្ធិរបស់គេស្របតាមធម្មនុញ្ញ ដើម្បីប្រជាធិបតេយ្យ និងសេរីភាពជាមូលដ្ឋាន»៕