(ប៉ាធុមថានី)៖ អនុព័ន្ធពាណិជ្ជកម្ម លោក ហេង សុវណ្ណារិទ្ធ តំណាង ឯកឧត្តម អ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃ បានស្នើក្រុមហ៊ុនផលិតម្ហូបអាហារដ៏ធំទី២ Betagro Group វិនិយោគបង្កើតរោងចក្រកែច្នៃម្ហូបអាហារនៅកម្ពុជា ដើម្បីជំរុញការអភិវឌ្ឍខ្សែច្រវ៉ាក់តម្លៃកសិផលខ្មែរ ដោយសហការជាមួយគម្រោងជំរុញទីផ្សារកសិកម្មខ្នាតតូច (AIMS) របស់ក្រសួងពាណិជ្ជកម្ម។

នៅក្នុងជំនួបជាមួយអនុប្រធានក្រុមហ៊ុន Betagro Group លោក Kritsana Wudhiprasertkul កាលពីថ្ងៃអង្គារ ទី០៦ ខែតុលា ឆ្នាំ២០២០នេះ លោក សុវណ្ណារិទ្ធ ​បានជម្រាបជូនអំពីកិច្ចប្រឹងប្រែងរបស់ស្ថានទូត ក្នុងការជំរុញការទូតសេដ្ឋកិច្ច (ពាណិជ្ជកម្ម វប្បធម៌ និងទេសចរណ៍),​ គោលនយោបាយបើកចំហរ និងលើកទឹកចិត្តរបស់រាជរដ្ឋាភិបាល ព្រមទាំងកំណែទម្រង់ស៊ីជម្រៅសំខាន់ៗ ដើម្បីលើកស្ទួយបរិយាកាសធុរកិច្ច និងការអភិវឌ្ឍវិស័យឯកជននៅក្នុង​ប្រទេស​កម្ពុជា។

លោកអនុព័ន្ធពាណិជ្ជកម្ម ក៏បានជម្រាបជូនភាគីថៃ អំពីគោលបំណងរបស់គម្រោង AIMS ដែលផ្តោតលើការតភ្ជាប់កសិផលិតកម្មជាមួយទីផ្សារ ដើម្បីលើកកម្ពស់ជីវភាពប្រជាកសិករ និងកិច្ចប្រឹងប្រែងរបស់ក្រសួងពាណិជ្ជកម្ម ក្នុងការចរចារកិច្ចព្រមព្រៀងពាណិជ្ជកម្មសេរី (FTA) ជាមួយប្រទេសដៃគូធំៗ សំដៅទាក់ទាញការវិនិយោគពីបរទេស និងធ្វើពិពិធកម្មទីផ្សារនាំចេញរបស់កម្ពុជា។

ជាការឆ្លើយតប លោក Kritsana បានថ្លែងអំណរគុណ លោកអនុព័ន្ធពាណិជ្ជកម្ម ដែលបានអញ្ជើញមកធ្វើទស្សនកិច្ចក្រុមហ៊ុន Betagro Group ដើម្បីផ្សព្វផ្សាយអំពីគោលនយោបាយវិនិយោគ និងកាលានុវត្តភាពធុរកិច្ចនៅកម្ពុជា។ លោកអនុប្រធានក្រុមហ៊ុនរូបនេះ បានសន្យាដឹកនាំគណៈប្រតិភូធ្វើទស្សនកិច្ចនៅកម្ពុជា នៅពេលព្រំដែនបើកឡើងវិញ ដើម្បីស្វែងយល់បន្ថែមអំពីសក្តានុពលគម្រោង AIMS និងឈានទៅចុះអនុស្សរណៈយោគយល់គ្នា ជាមួយក្រសួងពាណិជ្ជកម្ម៕