(ខេត្តក្រចេះ)៖ នារសៀល ថ្ងៃទី០៦ ខែតុលា ឆ្នាំ២០២០ លោកជំទាវ ខាំ សុភាព គណៈអភិបាលរងខេត្ត និងជាប្រធានក្រុមការងារថ្នាក់ខេត្តតំណាងឲ្យឯកឧត្តម វ៉ា ថន អភិបាល នៃគណៈអភិបាលខេត្តក្រចេះ បានអញ្ជើញចុះសំណេះសំណាល និងសួរសុខទុក្ខប្រជាកសិករ ដល់ស្ថានីយបូមទឹកមួយកន្លែង នៅចំនុចបឹងលំលាច សង្កាត់រការកណ្តាល ក្រុងក្រចេះ ខេត្តក្រចេះ អមដំណើរដោយ លោក ជុំទាវ ណៃ ធីតា ប្រធានមន្ទីរព័ត៌មានខេត្ត លោកស្រី ខៀវ សុផៃ អភិបាលរងក្រុងក្រចេះ លោក អ៊ឹង ឈុនផេង អនុប្រធានក្រុមសមាគមចលនាយុវជនកម្ពុជា សាខាខេត្តក្រចេះ និងសមាជិកជាច្រើនរូបទៀត។
ក្នុងកិច្ចសំណេះសំណាលនោះផងដែរ លោក ស្រី កុសល ចៅសង្កាត់រកាកណ្តាល បានធ្វើកិច្ចស្វាគមន៍ និងធ្វើរបាយការណ៍ពីបច្ចុប្បន្នភាពនៃការបូមទឹកក្នុងបឹងរម្លាច មានការស្រកស្រុត មានល្បឿនលឿន ដើម្បីបញ្ជៀសដល់ការលំបាកខ្វះទឹក សម្រាប់ស្រោចស្រព្វដំណាំស្រូវ របស់បងប្អូនប្រជាកសិករ នារដូវប្រាំងខាងមុខនេះ។
ឯកឧត្តម វ៉ា ថន អភិបាល នៃគណៈអភិបាលខេត្តក្រចេះ មានការយកចិត្តទុកដាក់ខ្ពស់ និងស្វែងយល់ពីសុខទុក្ខរបស់ប្រជាពលរដ្ឋ ជួបការលំបាក ខ្វះខាតទឹកនាពេលខាងមុខ ក៏បានឲ្យស្នើឲ្យមន្ទីរធនធានទឹក និងឧតុនិយមខេត្តបញ្ចេញម៉ាស៊ីនមួយគ្រឿង (ខ្នាតទុយយូមុខកាត់ ៣តឹក ) រួមនិងម៉ាស៊ីន ៤គ្រឿងទៀត របស់សហគមន៍យកទៅអន្តរាគមន៍ ជួយបូមទឹកពីបឹងខាងក្រោម មកស្តុកទុកក្នុងទំនប់ខាងលើ ដើម្បីត្រៀមទុកស្រោចស្រព្វដីស្រែប្រាំង ដែលមានទំហំផ្ទៃដី ៦២៧ហិកតា។
ចំពោះប្រេងម៉ាស៊ូតចំនួន ៣៦កាន ស្មើនឹង ១ពាន់លីត្រនេះ គឺជាការជួយឧបត្ថម្ភ ពីលោក មិត្ត ឆៃយុត ប្រធានសមាគមចលនាយុវជនកម្ពុជា ( ក្រុមគ.១៥៧) សាខាខេត្តក្រចេះ ដឹកនាំដោយលោក អ៊ឹង ឈុនផេង អនុប្រធានទី១ សាខាខេត្តក្រចេះ បាននាំប្រេងម៉ាស៊ូតទាំងនេះ មកជួយសម្រាប់ដំណើរការបូមទឹកបន្ត។
លោក ក៏បានសន្យាផងដែរថា បើប្រេង ដែលបានឧបត្ថម្ភមកនេះ បើពុំគ្រប់គ្រាន់ទេ លោក អ៊ឹង ឈុនផេង នឹងបន្តជួយឧបត្ថម្ភបន្ថែមទៀត ពីព្រោះលោកយល់ឃើញថា វិសាលភាពនៃផ្ទៃដី ដែលត្រូវស្រោចស្រពនៅទីនេះ មានលក្ខណៈធំធេង។
ប្រជាកសិករ នៅក្នុងសង្កាត់រកាកណ្ដាល បានថ្លែងអំណរគុណយ៉ាងជ្រាលជ្រៅ ដល់ក្រុមសមាគមចលនាយុវជនកម្ពុជា ហៅកាត់ថា គ.157 ដែលមានឯកឧត្តម មិត្ត ឆៃយុត្ត ជាប្រធានសមាគម បាននាំយកប្រេងចំនួន ១០០០ លីត្រស្មើនឹង៣៦ កាន មកជួយឧបត្ថម្ភដល់ការបូមទឹកចូលក្នុងអាងស្តុកទឹក ដើម្បីប្រើប្រាស់ការងារបង្កបង្កើនផលស្រូវក្នុងរដូវប្រាំង នៅក្នុងសង្កាត់រកាកណ្ដាល ក្រុងក្រចេះ ខេត្តក្រចេះ៕
