(ខេត្តកណ្តាល)៖ សម្តេចតេជោ ហ៊ុន សែន បានប្រកាស ណែនាំឲ្យក្រសួងសុខាភិបាល ចេញវិធានការទប់ស្កាត់ការឆ្លងជំងឺកូវីដ១៩ ក្នុងពេលបុណ្យអុំទូក ទោះជានៅរាជធានីភ្នំពេញ ត្រូវបានរាជរដ្ឋាភិបាល សម្រេចលុបចោល មិនប្រារព្ធធ្វើក៏ដោយ។ ប៉ុន្តែសម្តេចតេជោ ហ៊ុន សែន បញ្ជាក់ថា នៅតាមបណ្តាខេត្ត គេអាចអុំទូកតាមទម្លាប់ ដូច្នេះក្រសួងសុខាភិបាល ត្រូវមានវិធានការណែនាំ ដើម្បីកុំឲ្យឆ្លងរាលដាលជំងឺកូវីដ១៩។
សម្តេចតេជោ ហ៊ុន សែន បានប្រកាសថា ក្នុងអំឡុងពេលបុណ្យអុំទូកខាងមុខនេះ ទោះបីជារាជរដ្ឋាភិបាល លុបចោលពិធីជួបជុំបុណ្យអុំទូក តែពិធីអកអំបុកសំពះព្រះខែ នឹងនៅតែធ្វើធម្មតាតាមផ្ទះ តាមវត្តអារាម។ តែនៅតាមបណ្តាខេត្តមួយចំនួន គេអាចរៀបចំពិធីបុណ្យអុំទូក ដែលអ្នកស្រុក តែងធ្វើកន្លងមក។ ដូច្នេះក្រសួងសុខាភិបាល ត្រូវរៀបចំវិធានការណែនាំ ដើម្បីបង្ការ និងទប់ស្កាត់ការឆ្លងរាលដាលជំងឺកូវីដ១៩។
ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅឆ្នាំ២០២០ នេះ នឹងត្រូវប្រារព្ធឡើង នៅថ្ងៃទី៣០-៣១ ខែតុលា និងថ្ងៃទី១ ខែវិច្ឆិកា ឆ្នាំ២០២០។ ក៏ប៉ុន្តែដើម្បីបង្ការការឆ្លងរាលដាលជំងឺកូវីដ១៩ រាជរដ្ឋាភិបាល បានសម្រេចលុបចោល មិនរៀបចំពិធីបុណ្យអុំទូក នៅរាជធានីភ្នំពេញឡើយ៕
