(ភ្នំពេញ)៖ សម្តេចតេជោ ហ៊ុន សែន បានចាត់តាំងសម្តេចពិជ័យសេនា ទៀ បាញ់ ជាតំណាងដឹកនាំគណៈប្រតិភូ នាំយកអំណោយម៉ាសចំនួន ២លាន និងបរិក្ខារពេទ្យ ជូនរដ្ឋាភិបាល និងប្រជាជនឡាវ។ ម៉ាសចំនួន ២លាន និងបរិក្ខាពេទ្យមួយចំនួននេះ ត្រូវបានដឹកជញ្ជូនទៅរៀបចំដាក់យន្តហោះរួចរាល់ហើយ នៅរសៀលថ្ងៃអាទិត្យ ទី១៥ ខែវិច្ឆិកា ឆ្នាំ២០២០។
តាមគម្រោង យន្តហោះដឹក២លាន និងបរិក្ខារពេទ្យមួយចំនួននេះ នឹងចាកចេញពីអាកាសយានដ្ឋានអន្តរជាតិភ្នំពេញ ទៅកាន់ទីក្រុងវៀងចន្ទន៍ ប្រទេសឡាវ នាព្រឹកថ្ងៃចន្ទ ទី១៦ ខែវិច្ឆិកា ឆ្នាំ២០២០។
គណៈប្រតិភូកម្ពុជា ដែលនឹងធ្វើដំណើរតាមយន្តហោះពិសេស ដើម្បីយកជំនួយជូនរដ្ឋាភិបាល និងប្រជាជនឡាវ រួមមាន ៥រូប គឺសម្តេច ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីការពារជាតិ លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល ឯកឧត្តម សុខ សំអាង ឯកឧត្តម ជា វណ្ណា ជំនួយការសម្តេចពិជ័យសេនា ទៀ បាញ់ និងលោក សុង វិនតាក់ ប្រធាននាយកដ្ឋានទំនាក់ទំនងអន្តរជាតិ របស់ក្រសួងសុខាភិបាល៕
