(អន្តរជាតិ)៖ លោក ដូណាល់ ត្រាំ និងលោក ចូ បៃដិន កំពុងតាមដានលទ្ធផលបោះឆ្នោត ជ្រើសរើសប្រធានាធិបតីអាមេរិកអាណត្តិថ្មី ដោយការបោះឆ្នោតប្រធានាធិបតីអាមេរិក កំពុងឈានទៅរកទីបញ្ចប់ក្នុងនោះរដ្ឋហាវ៉ៃ និងអាឡាស្កា នឹងត្រូវបញ្ចប់ក្រោយគេ ហើយការចេញលទ្ធផលបណ្តោះអាសន្ន ក៏ត្រូវបានឡើងជាបន្តបន្ទាប់ផងដែរ។

ជាក់ស្ដែងបេក្ខភាពមកពីបក្សទាំង ២ បានបង្ហាញពីជំនឿចិត្តក្នុងការឈ្នះរៀងខ្លួន ដោយលោក Joe Biden បានថ្លែងទៅកាន់អ្នកគាំទ្រនៅរដ្ឋ Delaware ដែលលោកកំពុងនាំមុខថា៖«យើងជឿជាក់ថាយើងកំពុងស្ថិតនៅលើផ្លូវ ដើម្បីឈ្នះការបោះឆ្នោតនេះ។ យើងបានដឹងដោយសារតែការបោះឆ្នោតដែលមិនធ្លាប់មានពីមុនមក … វានឹងចំណាយពេលបន្តិច។ យើងនឹងត្រូវអត់ធ្មត់»។

លោកប្រធានាធិបតី ដូណាល់ ត្រាំ ក៏បានបង្ហោះសារនៅលើ Twitter ថា៖«យើងឡើងបានខ្ពស់» ព្រមទាំងបានអះអាងថា មានការប៉ុនប៉ងលួចសន្លឹកឆ្នោតនៅក្នុងការបោះឆ្នោតនេះទៀតផង។ លោកក៏បានបន្ថែមថានឹងធ្វើសេចក្តីថ្លែងការណ៍មួយនៅយប់នេះ ដោយបញ្ចប់ការសរសេររបស់គាត់ថា «ជ័យជំនះធំមួយ» ៕