(ភ្នំពេញ)៖ មូលនិធិម៉ានី នឹងសម្ពោធភាពយន្តឯកសារប្រវត្តិសាស្ត្រ «កម្ពុជា៖ បន្ទាត់ឆ្នាំ១៩៩៨» នៅថ្ងៃ០៦ ខែវិច្ឆិកាខាងមុខ ក្រោមអធិបតីភាពឯកឧត្តម ហ៊ុន ម៉ានី ប្រធានក្រុមប្រឹក្សាភិបាលមូលនិធិម៉ានី និងមានការចូលរួមពីសំណាក់តំណាងក្រសួង និងស្ថានប័នពាក់ព័ន្ធជាច្រើនរូបទៀត។

គួរជម្រាបថា ឆ្នាំ១៩៩៨ គឺជាបន្ទាត់ប្រវត្តិសាស្ត្ររបស់កម្ពុជា និងជាលទ្ធផលដែលកើតចេញពីការពុះពារស្វែងរកសុខសន្តិភាពជូនជាតិ និងប្រជាជន រហូតមានការវិវឌ្ឍខ្លួនមកដល់ពេលបច្ចុប្បន្នតាមរយៈនយោបាយឈ្នះ ឈ្នះ។ កម្ពុជាដែលធ្លាប់តែត្រូវបានបែងចែកទទួលបានសុខសន្តិភាព និងការបង្រួបបង្រួមជាតិជាលើកដំបូងក្នុងប្រវត្តិសាស្ត្ររបស់ខ្លួន ជាង៥០០ឆ្នាំចុងក្រោយ។ 

ភាពយន្តឯកសារ «កម្ពុជា៖ បន្ទាត់ឆ្នាំ១៩៩៨» បានធ្វើការរៀបរាប់នូវស្ថានភាពជាក់ស្តែងក្នុងសង្គមកម្ពុជា ដោយបានយកឆ្នាំ១៩៩៨ ជាបន្ទាត់នៃការប្រៀបធៀបវឌ្ឍនភាពសង្គម។ វីដេអូនេះ មានគុណប្រយោជន៍សម្រាប់ប្រជាជនកម្ពុជាគ្រប់ជំនាន់ ដើម្បីស្វែងយល់ពីតម្លៃនៃសុខសន្តិភាព និងជាមេរៀននៃការដឹកនាំប្រទេសប្រកបដោយសមត្ថភាពក្នុងភាពជាខ្មែរ និងប្រកបដោយធម៌ ហើយបន្តការដឹកនាំប្រទេសឈានឆ្ពោះទៅជាប្រទេសដែលមានចំណូលខ្ពស់នៅឆ្នាំ២០៥០។

សូមជម្រាបដែរថា ភាពយន្តឯកសារប្រវត្តិសាស្ត្រ «កម្ពុជា៖ បន្ទាត់ឆ្នាំ១៩៩៨» នេះ មានរយៈពេល ៣០នាទី ដោយតួអង្គសំខាន់ៗក្នុងភាពយន្តរួមមាន៖ សម្តេចពិជ័យសេនា ទៀ បាញ់, ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន, ឯកឧត្តម ប្រាក់ សុខុន និងឯកឧត្តមបណ្ឌិត ថោង ខុន ដែលឥស្សរជនទាំងបួនរូបបានផ្តល់កិច្ចសម្ភាសស្តីពីនយោបាយ ឈ្នះ ឈ្នះ និងវិស័យបន្ទុករៀងៗខ្លួន៕