(ភ្នំពេញ)៖ ក្រសួងទេសចរណ៍ បានប្រកាសនៅព្រឹកថ្ងៃទី២ ខែវិច្ឆិកា ឆ្នាំ២០២០ ថា ក្នុងឱកាសថ្ងៃឈប់សម្រាកនៃព្រះរាជពិធីគ្រងព្រះបរមរាជសម្បត្តិរបស់ព្រះមហាក្សត្រ នាថ្ងៃទី២៩ ខែតុលា និងរយៈពេលថ្ងៃ២ នៃព្រះរាជពិធីបុណ្យអុំទុក បណ្ដែតប្រទីប និងសំពះព្រះខែ អកអំបុក នាថ្ងៃទី៣០តុលា និងថ្ងៃទី៣១ ខែតុលា ឆ្នាំ២០២០មានភ្ញៀវទេសចរជាង ៤១ម៉ឺននាក់ ដើរលេងកម្សាន្ដនៅទូទាំងប្រទេស។ ក្នុងនោះ ខេត្តសៀមរាប ទទួលបានអ្នកទេសចរ ច្រើនជាងគេ។
ក្រសួងទេសចរណ៍ បានបញ្ជាក់ថា រយៈពេល ៣ថ្ងៃកន្លងមកនេះ គឺថ្ងៃទី២៩ ដល់ថ្ងៃទី៣១ ខែតុលា ឆ្នាំ២០២០ ភ្ញៀវទេសចរផ្ទៃក្នុង ដែលរួមមានប្រជាពលរដ្ឋខ្មែរ និងភ្ញៀវបរទេសផ្ទៃក្នុង ដែលបានដើរកម្សាន្ត សរុបមាន ៤១៨,០៨៩នាក់ ក្នុងនោះ ភ្ញៀវជាតិ មានចំនួន ៤១៨,០៩៦នាក់ និងភ្ញៀវបរទេសផ្ទៃក្នុង មានចំនួន ៥,៩៩៣នាក់។
តារាងរបស់ក្រសួងទេសចរណ៍ បង្ហាញថា គោលដៅទេសចរណ៍សំខាន់ៗ មួយចំនួន ដែលអ្នកទេសចរទៅលេង រយៈពេល ៣ថ្ងៃ ចាប់ពីថ្ងៃទី២៩-៣១ ខែតុលា ឆ្នាំ២០២០ រួមមាន៖
* ខេត្តសៀមរាប៖ ១១១,១១១នាក់
* ខេត្តកំពត៖ ៤៩,៤៦០នាក់
* ខេត្តព្រះសីហនុ៖ ៣៨,៦៣៧នាក់
* ខេត្តកណ្តាល៖ ២៩,៥៤០នាក់
* ខេត្តកែប៖ ២៣,១២៨នាក់
* ខេត្តកំពង់ស្ពឺ៖ ២០,៧៧៥នាក់
* ខេត្តមណ្ឌលគិរី៖ ១៧,២២៩នាក់
* ខេត្តកោះកុង៖ ១៥,៨៨៧នាក់
ក្រសួងទេសចរណ៍ បន្ថែមថា ដោយឡែក ក្រៅពីចំនួនអ្នកទេសចរជាង ៤១ ម៉ឺននាក់ខាងលើ តាមការវាយតម្លៃរបស់អាជ្ញាធររាជធានីភ្នំពេញ មានបងប្អូនប្រជាពលរដ្ឋប្រមាណ ៣០ ម៉ឺននាក់ផ្សេងទៀត ដែលបានដើរកម្សាន្ត នៅគោលដៅសំខាន់ៗ ពិសេសនៅតំបន់កោះពេជ្រ ទស្សនាកាំជ្រួច នៅមាត់ទន្លេមុខព្រះបរមរាជវាំង តំបន់កម្សាន្តជ្រោយចង្វារ និងតំបន់វិមានឈ្នះឈ្នះ នារយៈពេល ២ថ្ងៃកន្លងមក នៃព្រះរាជពិធីបុណ្យអុំទូក។
ក្រសួងទេសចរណ៍ បានកត់សម្គាល់ថា ដោយពុំមានការប្រារព្ធពិធីអុំទូកផ្លូវការ នៅរាជធានីភ្នំពេញ ហើយតាមបណ្តាខេត្ត ក៏មិនមានការរៀបចំពិធីបុណ្យអុំទូកដូចរាល់ឆ្នាំ និងអាស្រ័យដោយបញ្ហាទឹកជំនន់ ចំនួនភ្ញៀវទេសចរផ្ទៃក្នុង មានការថយចុះ ធៀបឆ្នាំមុន។ បញ្ហាទឹកជំនន់ ក៏បានធ្វើឱ្យការដើរកម្សាន្ត ទៅគោលដៅទេសចរណ៍ មួយចំនួន មានការលំបាក ដូចនៅតំបន់ពាយព្យ (រួមមានខេត្តបាត់ដំបង បន្ទាយមានជ័យ ប៉ៃលិន និងពោធិ៍សាត់) ទទួលបានភ្ញៀវត្រឹមប្រមាណ ២៦,៤២៦នាក់ ខណៈដែលតំបន់ឆ្នេរសមុទ្រ ដែលធ្លាប់មានភ្ញៀវទៅកម្សាន្តច្រើន ក៏ទទួលភ្ញៀវបានត្រឹមតែប្រមាណ ១២៧,១១២នាក់។
ប៉ុន្តែទោះយ៉ាងណា ក្រសួងទេសចរណ៍ បានកត់សម្គាល់បន្ថែមថា ខេត្តសៀមរាប នៅតែជាគោលដៅពេញនិយម ដោយបានទាក់ទាញភ្ញៀវទេសចរ បាន ១១១,១១១នាក់ ដែលភាគច្រើន បានទៅទស្សនាតំបន់រមណីយដ្ឋាន និងសហគមន៍នានា ក្នុងខេត្ត ដូចជា តំបន់ប្រាសាទអង្គរវត្ត ឧទ្យានជាតិភ្នំគូលែន សហគមន៍ព្រៃទឹកជប់ខ្នារពោធិ៍ សហគមន៍ត្រាវកុដិ សហគមន៍បឹងឈូកបន្ទាយស្រី រមណីយដ្ឋានភូមិវប្បធម៌កម្ពុជា ជាដើម។
ក្រសួងទេសចរណ៍ ក៏បានបញ្ជាក់បន្ថែមថា ពាក់ព័ន្ធការទប់ស្កាត់ការរីករាលដាលជំងឺកូវីដ-១៩ ក្រសួងទេសចរណ៍ បានដាក់ចេញសារាចរណែនាំមួយ កាលពីថ្ងៃទី២៦ ខែតុលា ឆ្នាំ២០២០ ឱ្យមន្ទីរទេសចរណ៍រាជធានី-ខេត្ត និងគ្រប់គោលដៅទេសចរណ៍ទាំងអស់ ពង្រឹងការអនុវត្តតាមប្រសាសន៍ក្រើនរំលឹករបស់សម្តេចតេជោ ការណែនាំរបស់ក្រសួងសុខាភិបាល និងវិធានសុវត្ថិភាពទេសចរណ៍ ដោយត្រូវសហការយ៉ាងជិតស្និទ្ធជាមួយគណៈបញ្ជាការឯកភាពរាជធានីខេត្ត៕
