(អន្តរជាតិ)៖ ទូរទស្សន៍រដ្ឋ IRIB បានផ្សាយថា អ្នកកាសែត អ៊ីរ៉ង់ មានឈ្មោះថា Rouhollah Zam ត្រូវបាន ព្យួរកនៅប្រទេសអ៊ីរ៉ង់ នាព្រឹកថ្ងៃសៅរ៍សប្តាហ៍នេះ។

លោក Zam ត្រូវបានរកឃើញថា មានពិរុទ្ធពី «បទពុករលួយដ៏ធ្ងន់ធ្ងរបំផុត» ជាការចោទប្រកាន់ ដែលមិនបានបញ្ជាក់ពីបទឧក្រិដ្ឋ ប៉ុន្តែ រដ្ឋាភិបាលអ៊ីរ៉ង់បានប្រើបទចោទនេះ ចំពោះជនដែលប៉ុនប៉ងផ្តួលរំលំរដ្ឋាភិបាល។

សារព័ត៌មាន រាយការណ៍ថា នៅឆ្នាំ២០១៩ លោក Zam បានបើកគេហទំព័រព័ត៌មានប្រឆាំងតាមប្រព័ន្ធអ៊ីនធឺណេត ឈ្មោះ Amad News ហើយត្រូវបានចោទប្រកាន់ដោយរដ្ឋាភិបាលអ៊ីរ៉ង់ថា បានផ្សាយញុះញង់ឱ្យមានអំពើហិង្សាអំឡុងពេលបាតុកម្មដ៏សាហាវនៅឆ្នាំ២០១៧ និងឆ្នាំ២០១៨។

អ្នកកាសែតរូបនោះ គឺលោក Zam បានរស់នៅនិរទេសនៅប្រទេសបារាំង បន្ទាប់មក គាត់ត្រូវបានចាប់ខ្លួនដោយអាជ្ញាធរអ៊ីរ៉ង់ នៅខែតុលាឆ្នាំ២០១៩។ បើយោងតាមក្រសួងការបរទេសបារាំងអ្នកកាសែតរូបនេះ បានចាកចេញពីប្រទេសបារាំងនៅថ្ងៃទី១១ខែតុលា ឆ្នាំ២០២០នេះ។ បីថ្ងៃក្រោយមកអង្គភាពឆ្មាំបដិវត្តអ៊ីស្លាមអ៊ីរ៉ង់បានចេញសេចក្តីថ្លែងការណ៍មួយដោយនិយាយថា «ខ្លួនបានឃុំខ្លួន Zam»។

បន្ទាប់ពីការចាប់ខ្លួន អាជ្ញាធរអ៊ីរ៉ង់ បានបញ្ចេញវីដេអូរបស់ Zam នៅក្នុងឡាន ដោយពាក់វ៉ែនតាខ្មៅ។ វីដេអូនេះ ក៏បង្ហាញឱ្យគាត់អង្គុយនៅពីមុខកាមេរ៉ាដោយធ្វើការសុំទោសចំពោះសកម្មភាពរបស់គាត់។ ទោះយ៉ាងណា គាត់ត្រូវបានរកឃើញថា មានពិរុទ្ធភាព ហើយត្រូវបានកាត់ទោស ប្រហារជីវិត ដោយព្យួរ ក៕