(ក្រចេះ)៖ សមត្ថកិច្ច បានបិទសណ្ឋាគារ «ចម្ប៉ា ពេជ្រ» ស្ថិតនៅទីរួមស្រុកស្នួល ខេត្តក្រចេះ នៅជិតសាលាស្រុកស្នួល ជាបណ្តោះអាសន្ន នៅរសៀលថ្ងៃទី៩ ខែធ្នូ ឆ្នាំ២០២០។ ហេតុផល ដោយសារឈ្មោះ អិត កុម៉ាល ភេទប្រុស អាយុ ៣៥ឆ្នាំ បានទៅស្នាក់នៅមួយយប់ ក្នុងសណ្ឋាគារនោះ កាលពីថ្ងៃទី១ ខែធ្នូ។

បុរសឈ្មោះ អិត កុម៉ាល ស្នាក់នៅសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ ត្រូវបានក្រសួងសុខាភិបាល បញ្ជាក់ថា វិជ្ជមានកូវីដ។

​សម្រាប់ក្រុមគ្រួសារ និងបុគ្គលិកសណ្ឋាគារមួយនេះ ចំនួន ៦២នាក់ ត្រូវបានឲ្យស្នាក់នៅខាងក្នុង និងយកសំណាក ទៅធ្វើតេស្ត។ នេះបើតាមការបញ្ជាក់របស់លោក សោម ណាល់ អភិបាលស្រុកស្នួល។

សូមរម្លឹកថា បុរស អិត កុម៉ាល បានទៅលេងនៅមណ្ឌលគិរី ហើយស្នាក់នៅ Relax Hill Resort ក្នុងក្រុងសែនមនោរម្យ កាលពីថ្ងៃទី២ ខែធ្នូ។ រីសតនោះ ក៏ត្រូវបិទអាជីវកម្ម រហូតដល់ថ្ងៃទី២៤ ខែធ្នូផងដែរ៕