(ចាកាតា)៖ ប្រធានាធិបតីឥណ្ឌូនេស៊ី លោក Joko Widodo បានមានប្រសាសន៍ថា នៅទីបំផុតប្រទេសឥណ្ឌូនេស៊ី ទទួលវ៉ាក់សាំង COVID-19 ដំបូងដែលដឹកតាមកប៉ាល់ពីប្រទេសចិន កាលពីថ្ងៃអាទិត្យ ស្របពេលរដ្ឋាភិបាលគ្រោងរៀបចំកម្មវិធីចាក់វ៉ាក់សាំងទ្រង់ទ្រាយធំ។ នេះបើយោងតាមការចុះផ្សាយរបស់សារព័ត៌មាន រ៉យទ័រ នៅថ្ងៃទី០៧ ខែធ្នូ ឆ្នាំ២០២០។

លោកប្រធានាធិបតីរូបនេះបានឱ្យដឹងទៀតថា ឥណ្ឌូនេស៊ីទទួលបានថ្នាំវ៉ាក់សាំងកូវីដ-១៩ ចំនួន ១.២លានដូស ពីក្រុមហ៊ុនចិន Sinovac Biotech ដែលវ៉ាក់សាំងនេះត្រូវបានឥណ្ឌូនេស៊ីយកមកសាកល្បងកាលពីខែសីហាកន្លងទៅ។ លោកបន្ថែមទៀតថារដ្ឋាភិបាលលោកនឹងទទួលបានចំនួន ១.៨លានដូសបន្ថែមទៀតនៅដើមខែមករា ឆ្នាំ២០២១។

សូមរំលឹកថាឥណ្ឌូនេស៊ី មានករណីឆ្លងកូវីដ-១៩កើនដល់ ៥៧៥.៧៩៦នាក់ និងមានអ្នកស្លាប់ចំនួន ១៧.៧៤០ នាក់ដែលជាចំនួនខ្ពស់បំផុតនៅអាស៊ីអាគ្នេយ៍៕