(ថៃ)៖ ប្រទេសថៃកំពុងធ្វើការស្វែងរកមនុស្សជាង២០០នាក់ នៅតាមខេត្តភាគខាងជើង ឱ្យមកធ្វើតេស្តរកកូវីដ-១៩ជាបន្ទាន់ ដើម្បីបញ្ឈប់ការរីករាលដាល ក្រោយមានជនជាតិថៃ ៣ បានលួចឆ្លងដែនដោយខុសច្បាប់ពីប្រទេសមីយ៉ាន់ម៉ា ចូលមកក្នុងប្រទេសថៃវិញ គេចពីការធ្វើចត្តាឡីស័ក្ត ក្រោយមកក៏បានតេស្តវិជ្ជមានកូវីដ-១៩។ នេះបើយោងតាមការចុះផ្សាយរបស់ CNA នៅថ្ងៃទី៣០ ខែវិច្ឆិកា ឆ្នាំ២០២០។

អភិបាលខេត្ត Chiang Rai លោក Prachon Pratsakul ថ្លែងប្រាប់អ្នកសារព័ត៌មានថា ស្ត្រី ៣នាក់ បានគេចពីប៉ុស្តិ៍ត្រួតពិនិត្យអន្តោប្រវេសន៍ ដោយមិនបានធ្វើចត្តាឡីស័ក។ លោកបានបន្ថែមថាយ៉ាងហោច៣៥៦នាក់ នៅក្នុងខេត្ត Chiang Rai និងខេត្ត Chiang Mai អាចនឹងប៉ះពាល់ស្រ្តីទាំងនោះ ខណៈនេះមានមនុស្សច្រើនជាង១៥០នាក់ នៅខេត្តភាគខាងជើង ត្រូវបានធ្វើតេស្ដអវិជ្ជមាន COVID-19។

ប្រទេសថៃមានវិធានការណ៍ និងការត្រួតពិនិត្យតាមព្រំដែនយ៉ាងតឹងរឹង ស្របពេលប្រទេសនេះមានអ្នកឆ្លង COVID-19 សរុប៣,៩៩៨នាក់ ក្នុងនោះស្លាប់៦០នាក់ និងជាសះស្បើយឡើងវិញ ៣,៨០៣នាក់៕