(ភ្នំពេញ)៖ គិតត្រឹមម៉ោង១៨:០០នាទី ថ្ងៃទី២៩ ខែវិច្ឆិកា ឆ្នាំ២០២០ ករណីសង្ស័យពុលស្រាស នៅខេត្តកំពង់ឆ្នាំង ដែលកើតមាននាថ្ងៃទី២៨ ខែវិច្ឆិកា ឆ្នាំ២០២០ បានកើតឡើង ដោយមានជនរងគ្រោះកើនឡើងដល់១១៥នាក់ ហើយក្នុងនោះ៥នាក់ បានស្លាប់។ នេះបើតាមលោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល។

លោកជំទាវ ឱ វណ្ណឌីន បានប្រកាសក្នុងក្រុមតេឡេក្រាមរបស់លោកជំទាវ នៅយប់នេះថា ករណីសង្ស័យពុលស្រាស នៅឃុំខ្លុងពពក ស្រុកទឹកផុស ខេត្តកំពង់ឆ្នាំង គឺអ្នកបានទទួលព្យាបាលនៅមន្ទីរពេទ្យខេត្តកំពង់ឆ្នាំង មានចំនួន ១០៥នាក់ (ស្រី ៦នាក់) ក្នុងចំណោមនោះ អ្នកមានស្ថានភាពធ្ងន់ធ្ងរចំនួន៦នាក់ និងបានបញ្ជូនទៅមន្ទីរពេទ្យកាល់ម៉ែតចំនួន០៥នាក់ (ស្លាប់នៅតាមផ្លូវពេលបញ្ជូនចំនួន ០២នាក់ និងករណីនៅធ្ងន់ធ្ងរកំពុងសង្គ្រោះ ០១នាក់)។ ក្នុងនោះ ក៏មានមានករណី ស្លាប់នៅមន្ទីរពេទ្យខេត្តកំពង់ឆ្នាំង០១នាក់ ស្លាប់នៅផ្ទះ ០១នាក់ និងបានព្យាបាលនៅមណ្ឌលសុខភាពអភិវឌ្ឍន៍ ចំនួន១០នាក់។

លោកជំទាវ ឱ វណ្ណឌីន លើកឡើងថា មូលហេតុអ្នកទាំងអស់ខាងលើពុល គឺបន្ទាប់ពីបានមកចូលរួមកំដរបុណ្យសពក្នុងភូមិ ហើយជួបជុំគ្នាពិសារស្រាស រីឯការសន្និដ្ឋានរបស់ក្រុមការងារចុះស្រាវជ្រាវពិនិត្យ គឺជាករណីសង្ស័យពុលស្រាស។ រដ្ឋមន្ត្រីក្រសួងសុខាភិបាល ក៏បានចាត់មន្ត្រីជំនាញចុះផ្ទាល់ករណីនេះដែរ៕