(ភ្នំពេញ)៖ អ្នកនាំពាក្យក្រសួងសុខាភិបាល បានបញ្ជាក់ថា ដើម្បីចូលរួមបង្ការ ទប់ស្កាត់ការរីករាលដាលនៃជំងឺកូវីដ ១៩ ក្រសួងមហាផ្ទៃ បានចាត់វិធានការអនាម័យដោយបាញ់ថ្នាំសម្លាញ់មេរោគ នៅតាមអគារក្នុងទីស្តីការក្រសួងមហាផ្ទៃ មណ្ឌលអប់រំកែប្រែទី១ សាលាបណ្ឌិត្យសភានគរបាលកម្ពុជា និងសូមថ្នាក់ដឹកនាំ មន្ត្រីរាជការស៊ីវិល មន្ត្រីនគរបាលជាតិ និងមន្ត្រីពន្ធនាគារ ដែលមានការពាក់ព័ន្ធដោយផ្ទាល់ ឬដោយប្រយោលទាំងអស់ សូមធ្វើតេស្តរកជំងឺកូវីដ ១៩ និងធ្វើចត្តាឡីស័កដោយអនុវត្តការដាក់ខ្លួនឱ្យនៅដាច់ដោយឡែក ដើម្បីតាមដានសុខភាពក្នុងរយៈពេល ១៤ថ្ងៃ ឱ្យបានច្បាស់លាស់បំផុត។ ចំពោះថ្នាក់ដឹកនាំ មន្ត្រីរាជការស៊ីវិល មន្ត្រីនគរបាលជាតិ និងមន្ត្រីពន្ធនាគារ ដែលមិនមានការពាក់ព័ន្ធ សូមបន្តបំពេញភារកិច្ចជាធម្មតា ដោយត្រូវប្រកាន់ខ្ជាប់វិធានការអនាម័យ ពាក់ម៉ាស់ លាងដៃ រក្សាគម្លាត ចៀសវាងការប្រមូលផ្តុំ និងតាមដានសុខភាពជាប្រចាំ។
សេចក្តីប្រកាសរបស់អ្នកនាំពាក្យក្រសួងមហាផ្ទៃ បានលើកឡើងថា កិច្ចប្រជុំកាលពីថ្ងៃទី២៤ ខែវិច្ឆិកា ដែលឯកឧត្តម ឆែម សាវុធ បានចូលរួម ក្រោមអធិបតីភាពសម្តេចក្រឡាហោម ស ខេង កាលពីថ្ងៃទី២៤ ខែវិច្ឆិកា អនុវត្តតាមគោលការណ៍ណែនាំរបស់ក្រសួងសុខាភិបាល ដោយសមាសភាពចូលរួមទាំងអស់ បានរក្សាគម្លាតសុវត្ថិភាព ព្រមទាំងពាក់ម៉ាស់ ឆ្លងកាត់ការវាស់កំដៅ និងបាញ់អាល់កុលសម្លាប់មេរោគគ្រប់គ្នា។
សេចក្តីប្រកាស បន្តថា បន្ទាប់ពីបញ្ចប់កិច្ចប្រជុំ សម្តេចក្រឡាហោម បានដើរឆ្លងកាត់ពីក្រោយខ្នងឯកឧត្តម ឆែម សាវុធ ហើយពេលនោះដែរ ឯកឧត្តម ឆែម សាវុធ បានក្រោកឈរ និងបាននិយាយឆ្លើយឆ្លងខ្លីមួយម៉ាត់ពីរជាមួយសម្តេច៕
