(ភ្នំពេញ)៖ តាមគម្រោង នៅព្រឹកថ្ងៃទី២៩ ខែវិច្ឆិកា ឆ្នាំ២០២០ កម្ពុជា តាមរយៈក្រសួងសុខាភិបាល ត្រូវដឹកជញ្ជូនម៉ាស ១លាន ៥ម៉ឺន និងបរិក្ខារពេទ្យជាច្រើនទៀត យកទៅប្រគល់ជូនប្រទេសទីម័រលេស្ត។ ក៏ប៉ុន្តែកម្មវិធីនេះ ត្រូវលើកពេលទៅវិញ។
ជុំវិញករណីនេះ លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានឆ្លើយតបនឹងសំណួរអ្នកកាសែត នាព្រឹកថ្ងៃអាទិត្យនេះ ដោយលោកជំទាវ អះអាងថា មិនទាន់មានព័ត៌មាននេះទេ។
កាលពីថ្ងៃទី២៦ ខែវិច្ឆិកា ឆ្នាំ២០២០ បន្ទាប់ពីក្រសួងសុខាភិបាល ដឹកជញ្ជូនម៉ាសជាង ២លាន និងបរិក្ខារពេទ្យ ១២មុខ យកទៅប្រគល់ជូនរដ្ឋាភិបាលភូមារួចមក សម្តេចតេជោ ហ៊ុន សែន បានប្រកាសផ្តល់ម៉ាស ១លាន ៥ម៉ឺន និងបរិក្ខារពេទ្យជាច្រើនទៀត ដល់រដ្ឋាភិបាល និងប្រជាជនទីម័រលេស្ត ដើម្បីចូលរួមប្រយុទ្ធប្រឆាំងជំងឺកូវីដ១៩។ តាមគម្រោង ម៉ាស និងសម្ភារៈពេទ្យទាំងនោះ នឹងត្រូវក្រសួងសុខាភិបាល ដឹកជញ្ជូនតាមយន្តហោះពិសេស ពីភ្នំពេញ ទៅប្រទេសទីម័រលេស្ត នៅថ្ងៃអាទិត្យ ទី២៩ ខែវិច្ឆិកានេះ។ ប៉ុន្តែដោយសារតែប្រទេសយើង ជួបហេតុការណ៍នៃការឆ្លងរាលដាលជំងឺកូវីដ១៩ ក្នុងក្រុមគ្រួសារអគ្គនាយកពន្ធនាគារនៃក្រសួងមហាផ្ទៃ ហើយប្រភព និងទំហំនៃការឆ្លងនេះ មិនច្បាស់លាស់ ទើបកម្ពុជាលើកពេលដឹកជញ្ជូនម៉ាសនេះ ទៅទីម័រលេស្ត នៅថ្ងៃអាទិត្យនេះ។
សូមរម្លឹកថា កាលពីថ្ងៃទី១៦ ខែវិច្ឆិកា កម្ពុជាបានដឹកជញ្ជូនម៉ាសជាង ២លាន និងបរិក្ខារពេទ្យ ១២មុខ យកទៅជូនរដ្ឋាភិបាល និងប្រជាជនឡាវ ដើម្បីទប់ទល់នឹងការឆ្លងរាតត្បាតជំងឺកូវីដ១៩។ ជំនួយមនុស្សធម៌ដូចគ្នានេះ ក៏ត្រូវបានក្រសួងសុខាភិបាល ដឹកជញ្ជូនតាមយន្តហោះពិសេស ពីភ្នំពេញ ទៅកាន់ប្រទេសភូមាផងដែរ កាលពីថ្ងៃទី២៦ ខែវិច្ឆិកា៕
